ގެވެށި އަނިޔާ ލިބޭ މީހުންނަށް ވަގުތީ ހިޔާވަހިކަމާއި އިތުރު ރައްކާތެރިކަން ދިނުމަށް، ރާއްޖޭގެ ތިން ސަރަހައްދެއްގައި މަރުކަޒެއް އަޅަން ހަމަޖެހިފައިވާ ކަމަށް އިޖުތިމާއީ ހިދުމަތްތަކުގެ ވަޒީރު އާއިޝަތު ޝިހާމް މިއަދު ވިދާޅުވެއްޖެ އެވެ.

މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވަޒީރު ޝިހާމް މިއަދު ވިދާޅުވީ މިހާތަނަށް އައި އިރު ވެސް އެފަދަ ފަރާތްތަކަށް ރައްކާތެރިކަމުގެ ހިދުމަތްތައް ދެވޭނެ ތަންތަން ހެދިފައި ނެތް ކަމަށެވެ.

ކޮންމެ މީހަކަށް ސަލާމަތާއި ރައްކާތެރިކަން ލިބޭނެ ތަނެއް، އެ މީހަކު ދިރިއުޅޭ ރަށުން ނުލިބިދާނެ އެވެ. އަދި ލިބޭނެ ރަށަކަށް ދަތުރުކޮށްފައި ދާން ވެސް ގޮންޖެހުންތަކެއް ހުރެދާނެ އެވެ.

މި ސަރުކާރުގެ ސިޔާސަތަކީ އެ ކަމަށް ބޭނުންވާ މަރުކަޒުތަކެއް ފުރަތަމަ ގާއިމުކުރުމަށްފަހު، ދެން އެ މަރުކަޒުތަކުން އެފަދަ ފަރާތްތަކަށް ވަގުތުން ދޭން ޖެހޭ ރައްކާތެރިކަމާއި އިތުރު އިޖުތިމާއީ ހިދުމަތްތައް ފޯރުކޮށްދިނުމެވެ.

މި ވަގުތު ސަރުކާރުން އަޅަން ނިންމާފައިވާ ތިން މަރުކަޒަކީ:

• އައްޑޫ ސިޓީ ހިތަދޫ: އިމާރާތުގެ މަސައްކަތް ވަރަށް އަވަހަށް ފެށޭނެ

• ހުޅުމާލޭ: އެ މަސައްކަތަށް ބަޔަކު ހޯދަން ވަނީ އިއުލާންކޮށްފައި

• ރ. އުނގޫފާރު: މަރުކަޒެއް އެޅުމަށް ނިންމި ކަން