ތ.ކަނޑޫދޫން ފުރައިގެން މާލެއަށް ދަތުރުކުރަމުން ދަނިކޮށް އަލިފާންރޯވެ އެނދި ހޮޅުދޫ ބޯޓުން ގެއްލުނު ޒުވާނާ ހޯދަން ޑްރޯން ބޭނުންކުރަންފަށައިފިއެވެ. 

އެމްއެންޑީއެފުން ރޭ ބުނެފައިވާގޮތުން ތ.ހިރިލަންދޫން ފުރައިގެން މާލެ ދަތުރުކުރަމުން ދަނިކޮށް ހޮޅުދޫ ބޯޓުގައި އަލިފާން ރޯވިކަމުގެ ހަބަރު އެ އިދާރާއަށް ލިބިފައިވަނީ ރޭ 21:07 ހާއިރުކަމަށެވެ. އަދި އެބޯޓުން ދަތުރުކުރި މީހުންގެ އަދަދަކީ 18 މީހުން ކަމަށާއި، އޭގެތެރެއިން އެކަކު ގެއްލިފައިވާކަމުގެ ހަބަރު ލިބިފައިވާކަމަށެވެ. ގެއްލިފައިވަނީ ލ.މާވަށަށް ނިސްބަތްވާ 25އަހަރުގެ އަލީ މުޝްފިގު މުހައްމަދު ޝަރީފެވެ. އޭނާ ހޯދުމުގެ މަސައްކަތް އެމްއެންޑީއެފުންވަނީ ފަށާފައެވެ. 

މިގޮތުން ގެއްލިފައިވާ ޒުވާނާ އަލީ މުޝްފިގު މުހައްމަދު ޝަރީފް ހޯދުމުގެ އެންމެފަހުގެ މައުލޫމާތު އެމްއެންޑީއެފުން މިއަދު ހިއްސާކޮށްފައިވެއެވެ. އެ އިދާރާއިން ބުނެފައިވަނީ ކޯސްޓް ގާރޑް ޝިޕް ގާޒީ އާއި، އެފްއައިސީ މާފަތާއި، އެޗްޕީ 114 ޑައިވަރުންނާއި، އެއަރކޯޑްގެ ޑްރޯންގެ އިތުރުން އެމްއެންޑީއެފްގެ ސެންޓްރަލް އޭރިއާ ކޮމާންޑްގެ ސިފައިން ގުޅިގެން ކަނޑުމަތިންނާއި، ޑައިވްކޮށްގެންނާއި، ވައިގެ މަގުންވެސް ގެއްލުނު ޒުވާނާ ހޯދުމުގެ މަސައްކަތް ކުރަމުން އަންނަކަމަށެވެ. 

މި ހާދިސާގައި އަލިވާންރޯވި ހޮޅުދޫ ބޯޓު ވަނީ ގާތްގަނޑަކަށް ރޭގެ ދަންވަރު 02:07 ހާއިރު ނިންވަން އުޅުމުގެ ތެރޭގައި އަޑިއަށް ގޮއްސައެވެ. އަދި ބޯޓުގެ ބައެއް ބައިތައް އޮޔާ އެ ސަރަހައްދުގައި ގޮސްފައިވެއެވެ. އެހެންކަމުން އެމްއެންޑީއެފުން ވަނީ އެ ސަރަހައްދުން ދަތުރުކުރާ ފަރާތްތަކަށް ދަތުރުކުރާއިރު ސަމާލުވުމަށް އިލްތިމާސްކޮށްފައެވެ.