ރާއްޖޭގައި ގަވާއިދާ ހިލާފަށް އުޅެމުން ދިޔަ ފަސް ބިދޭސީއަކު އަތުލައިގަނެ އިމިގްރޭޝަނުގެ ބެލުމުގެ ދަށަށް ގެންގޮސްފި އެވެ. 

އިމިގްރޭޝަނުން ބުނީ މިމީހުން އަތުލައިގެންފައި ވަނީ، ރާއްޖޭގައި ގަވާއިދާ ހިލާފަށް އުޅެމުން އަންނަ ބިދޭސީންގެ މައްސަލަ ހައްލުކުރުމަށް ކުރިއަށްގެންދާ ހާއްސަ އޮޕަރޭޝަނުގެ ތެރެއިން ހީނާމާގޭ ޕާކިން ޒޯނު ސަރަހައްދުގައި އުޅޭ ބިދޭސީން ބަލައި ފާސްކުރުމުގެ ތެރޭގައި ކަމަށެވެ. 

މި އޮޕަރޭޝަނުގެ ތެރެއިން ފަސް ބިދޭސީން އިމިގްރޭޝަނުގެ ބެލުމުގެ ދަށަށް ރޭ ގެންގޮސްފައިވާކަމަށް އެ ހިދުމަތުން މައުލޫމާތު ދިނެވެ. 

އިމިގްރޭޝަނުން ކުރިއަށް ގެންދާ މި އޮޕަރޭޝަންތަކުގައި މިހާތަނަށް ގިނަ އަދަދަކަށް ބިދޭސީން ވަނީ ރާއްޖެއިން ޑީޕޯޓުކޮށްލާފަ އެވެ.

ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް އިމިގްރޭޝަނުން ކަމާ ގުޅޭ އިދާރާތަކާ ގުޅިގެން މި އޮޕަރޭޝަން ކުރިއަަށް ގެންދާއިރު، މަގާމުގެ ނުފޫޒު ބޭނުންކޮށްގެން ބިދޭސީއެއްގެ އަތުން ބައި މިލިއަން ރުފިޔާ ހޯދި މައްސަލައެއްގައި އިމިގްރޭޝަން އޮފިސަރުންތަކެއް ވަނީ ހައްޔަރުކޮށްފަ އެވެ.  

ހައްޔަރުކުރި މީހުންގެ ތެރޭގައި އިމިގްރޭޝަން ކޮންޓްރޯލާ ޖެނެރަލް މުހައްމަދު ޝަމްއާން ވަހީދާއި، ކޮންޓްރޯލާ ބިއުރޯގައި މަސައްކަތްކުރާ ތިން މުވައްޒަފުން ހިމެނެ އެވެ.