ގަވައިދާ ހިލާފަށް ކާބޯތަކެތީގެ ވިޔަފާރިކުރަމުންދިޔަ 3 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

މިމަހުގެ 5 ވަނަ ދުވަހު އިމިގްރޭޝަންގެ ވޮޗަށް ހުށައެޅުނު ރިޕޯޓަކާ ގުޅިގެން މ.ހާމަނީ ނަމަކަށް ކިޔާ ގެއެއް ބަލާފާސްކުރުމުގެ ތެރޭގައި ތިން ބިދޭސީީއަކު އެގެއިން ފެނިފައިވާ ކަމަށެވެ.

އެ މީހުން މިހާރު ވަނީ މޯލްޑިވްސް އިމިގްރޭޝަނުގެ ބެލުމުގެ ދަށަށް ގެންދެވިފައި ކަމަށް އެ އިދާރާއިން ބުންޏެވެ.

އިމިގްރޭޝަނުން ބުނީ އެ ގޭގެ ފުރަތަމަ ފަންގިފިލާގައި ރޭގަނޑު 9 އަކުން ފެށިގެން މެންދަމު 2 ޖެހުމާ ހަމައަށް ކާބޯތަކެތި ތައްޔާރުކޮށް ޑެލިވަރީކުރުމުގެ ވިޔަފާރި އޮންލައިންކޮށް ކުރަމުންދާ ކަމަށެވެ.

އަދި އެ މަސައްކަތް ކުރަމުން ގެންދިޔަ 3 ބިދޭސީން މަސައްކަތް ކުރަމުން ދިޔައީ ދޫކޮށްފައިވާ ހުއްދައިގެ ބޭރުން ގަވާއިދާ ހިލާފަށްކަމަށްވެސް އިމިގްރޭޝަނުން ބުންޏެވެ.

ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ޓަކައި އިމިގްރޭޝަނުން ކުރަމުން ގެންދާ މަސައްކަތުގެ ތެރެއިން އެ އިދާރާއަށް ހުށައެޅޭ މި ކަހަލަ މައްސަލަތަކާއި ގުޅިގެން ރެއިޑް ތަކާއި އޮޕަރޭޝަންތައް އެ އިދާރާއިން އަންނަނީ ހިންގަމުންނެވެ.

ހާއްސަކޮށް ބިދޭސީން ހަރަކާތްތެރިވާ ތަންތަން ބަލާ ފާސްކޮށް ފިޔަވަޅު އަޅަމުން ގެންދެ އެވެ. މިގޮތުން އެފަދަ ބިދޭސީން އިމްގްރޭޝަނަށް ގެންގޮސް ޑީޕޯޓު ކުރުމުގެ މަސައްކަތްވެސް އިމްގްރޭޝަނުން އަންނަނީ ކުރަމުންނެވެ.