މިދިޔަ ސަރުކާރުގައި ގައުމު ދަރުވާލާފައި އެމްޑީޕީ މެންބަރުން ސުވާލުކުރުމުން ލަދުގަންނަން ޖެހޭކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.

ހިތަދޫގައި އަޅަން ފެށި އިސްލާމީ މަރުކަޒުގެ މަސައްކަތް ކުރިއަށް ނުދާތީ އެކަމާ ގުޅިގެން ސުވާލުކުރުމުން މަޖިލީހުގެ މިއަދުގެ ޖަލްސާ އަށް ޝަހީމް ހާޒިރުކުރުި އެވެ.

މަޖިލީހުގައި ވާހަކަ ދައްކަވަމުން ޝަހީމް ވިދާޅުވީ މި ސަރުކާރުން ވެރިކަމާއި ހަވާލުވިއިރު ކުރީ ސަރުކާރުން ނުދައްކާ 50 މިލިއަނެއްހާ ރުފިޔާ އޮތް ކަމަށެވެ. އެ ހުރިހާ ފައިސާއެއް މި ސަރުކާރުން ދައްކާފައިވާ ކަމަށް މިނިސްޓަރު ވިދާޅުވި އެވެ.

'' 50 މިލިއަން ރުފިޔާއިން އިސްލާމިކް މިނިސްޓްރީ ދަރުވާފައި ދިޔައީ ލަދުގަންނަން ޖެހޭނެ ސުވާލުކުރަން" ޝަހީމް ވިދާޅުވި އެވެ. 

ޝަހީމް ޖަވާބުދެއްވުމުން މަޖިލީހުގެ ތަޅުން ހޫނުވި އެވެ. އަދި ތަޅުމުގައި އަޑުގަދަކުރަން ފެށުމުން ރިޔާސަތުން ވަނީ މަޖިލީހުގެ ބައެއް މެންބަރުންނަށް ނަސޭހަތްތެރިވި އެވެ. އޭގެ ފަހުން ރިޔާސަތުން ވަނީ ކެންދޫ ދާއިރާގެ މެންބަރު މައުރޫފް ޒާކިރުގެ ނަން އިއްވައި ތަޅުމުން ބޭރުކޮށްފަ އެވެ.