ގައިން ގަޔަށް އަރާ ބައްޔެއް ހުރި ބިދޭސީއަކު ގެއްލިގެން ހޯދަން ފަށައިފި އެވެ.

އެނގިފައިވާ ގޮތުގައި ގެއްލިގެން ހޯދަމުން ދަނީ ވަޑާންކުރުމުގެ މަސައްކަތުގައި އުޅޭ ރޫހުލް އަމީން ނަމަކަށް ކިޔާ  ބަންގްލަދޭޝް ފިރިހެނެކެވެ. އޭނާ ގެއްލުނީ މިދިޔަ އަންގާރަ ދުވަހުގަ އެވެ.

އަމީންގެ ސްޕޮންސަރު  މުހައްމަދު ޝަރީފް ފޭސްބުކްގައި ކުރި ޕޯސްޓެއްގައި ވަނީ އަމީންއާ ގުޅޭ އެއްވެސް މައުލޫމާތެއް ލިބިފައިވާނަމަ އޭނާގެ ނަންބަރު 7478833 އަށް ގުޅައި އަންގައި ދިނުމަށް އެދިފަ އެވެ.

އެ ޕޯސްޓުގައި ޝަރީފް ބުނެފައި ވަނީ ވިލިމާލެ ފެކްޓަރީގައި މަސައްކަތް ކުރަމުން ދިޔަ އަމީން ގެއްލިފައި ވަނީ އެއާޕޯޓަށް ދާން މާލެ ދިޔުމަށް ވިލިމާލެ ފެރީއަށް އެ ދުވަހު ހެނދުނު އެރުމަށްފަހު ކަމަށެވެ. އަދި އޭނާ އަކީ (އެޗްޕީއޭ އިން ހާމަވެފައިވާ ގޮތުގައި) ގައިން ގަޔަށް އަރާ ބައްޔެއް ހުރި މީހެއް ކަމަށާއި އޭނާ ބަންގްލަދޭޝަށް އަނބުރާ ދާން އުޅުނީ ބޭސްފަރުވާއަށް ކަމަށް ވެސް ބުނެފައިވެ އެވެ.

ޝަރީފް ބުނީ އެ މައްސަލަ ފުލުހުންނާ އިމިގްރޭޝަންއަށް އަދި ހުށަނާޅާ ކަމަށެވެ. ނަމަވެސް އެޗްޕީއޭއަށް ރިޕޯޓްކުރުމުން ބިދޭސީ މީހާ އަދި ނުފުރާކަން ކަށަވަރުކޮށްދީފައިވާ ކަމަށް ވެސް އޭނާ ބުންޏެވެ.