ހުވަދުއަތޮޅު އުތުރުބުރީ މާމެންދޫގެ އިހްތިސާސްތެރޭގައި އެ އަތޮޅު ހުޅިމެންދޫ ހިމެނުއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

މިކަން ނިންމަވާފައި ވަނީ ރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ގާނޫނުން  އެންމެހައި އިދާރީ ދާއިރާތަކުގައި ހިމެނޭ ސިޓީ ކައުންސިލްތަކާއި ރަށު ކައުންސިލްތަކުގެ އިހްތިސާސް ކަނޑައެޅުމަށް ރައީސުލްޖުމްހޫރިއްޔާއަށް މަތިކޮށްފައިވާ މަސްއޫލިއްޔަތުގެ ދަށުން، އެމަނިކުފާނު މިއަދު ނެރުއްވި ޤަރާރުންނެވެ.

ހުޅިމެންދޫއަކީ މާމެންދޫއާ އެއް ފަޅެއްގައި އޮންނަ ގާތްގަނޑަކަށް 5 ހެކްޓަރުގެ ރަށެކެވެ. މި ރަށަކީ މީގެކުރިންވެސް މާމެންދޫ ކައުންސިލުގެ އިހްތިސާސް ތެރޭގައި ހިމަނާފައި އޮތް ރަށެކެވެ.

މިދިޔަ ސަރުކާރުން އޮތީ ހުޅިމެންދޫ މާމެންދޫގެ އިހްތިސާސްގެ ތެރެއިން ނަގައި ފަތުރުވެރިކަމަށް ދޫކޮށްފަ އެވެ. އެރަށް އަލުން މާމެންދޫގެ އިހްތިސާސްތެރެއަށް ބަދަލުކޮށްފައިވާއިރު، އެރަށް ފަތުރުވެރިކަމަށް ތަރައްގީކުރުން ވަނީ ހުއްޓިފަ އެވެ.