ފުވައްމުލަކުގައި މަސްތުވާތަކެތި ވިއްކައި ވިޔަފާރިކުރުމުގެ ނެޓްވޯކެއް ހިންގިކަމުގެ ތުހުމަތުގައި ހައްޔަރުކޮށްފައިވާ ދެމީހުންގެ މައްޗަށް މަނީ ލޯންޑަރިންގެ ދައުވާ އުފުލުމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ނިންމައިފި އެވެ. 

މި ދައުވާ އުފުލުމަށް ނިންމާފައި ވަނީ މިދިޔަ އޭޕްރީލް މަހުގެ 27ގައި ފުވައްމުލަކު ސިޓީގައި ފުލުހުން ހިންގި ހާއްސަ އޮފަރޭޝަނެއްގައި އަތުލައިގަތް ޑްރަގް ނެޓްވޯކުގެ އިސްކޮށް ހަރަކާތްތެރިވާކަމަށް ތުހުމަތުކޮށްފައިވާ ޙަސަން ޢާޒިމް އާއި އަޙްމަދު ނިއުޝާދުގެ މައްޗަށެވެ. 

މި ދެމީހުންގެ މައްޗަށް ދެ ދައުވާއެއް އުފުލުމަށް ޕީޖީ އޮފީހުން ވަނީ ނިންމާފަ އެވެ. އެއީ މަނީ ލޯންޑްރިންގގެ ކުށުގެ ދަޢުވާގެ އިތުރުން ކުށްކުރާ ޖަމާޢަތެއްގައި ބައިވެރިވުމުގެ ކުށުގެ ދަޢުވާ އެވެ. 

މަނީ ލޯންޑަރިންގެ ދައުވާ؛

އާޒިމްގެ މައްޗަށް މަނީ ލޯންޑަރިންގެ ދައުވާ އުފުލާފައި ވަނީ، މަސްތުވާތަކެއްޗާ ގުޅުންހުރި އެކި ފަރާތްތަކުން އޭނާގެ އެކައުންޓުތަކަށް ޖަމާކުރި 5.9 މިލިއަން ރުފިޔާއަކީ، ކުށް ކޮށްގެން ހޯދާފައިވާ ފައިސާކަން އެނގި ހުރެ، އެ ފައިސާ ބަހައްޓައި ބޭނުންކޮށްފައިވާތީ އެވެ.

ހަމަ އެގޮތަށް ނިއުޝާދުގެ އެކައުންޓަށް 21.1 މިލިއަން ރުފިޔާ އެފަދަ ފަރާތްތަކުން ފޮނުވާފައިވާކަމަށާއި، އެފައިސާ ބަހައްޓައި ބޭނުންކޮށްފައިވާތީ އޭނާގެ މައްޗަށް ވެސް މަނީ ލޯންޑަރިންގެ ދައުވާ އުފުލުމަށް ޕީޖީ އޮފީހުން ނިންމާފައި ވެއެވެ.

މި ދެ މީހުންގެ މައްޗަށް ދައުވާ އުފުލާފައި ވާއިރު، އެމީހުން ކުށްކޮށްގެން ހޯދާފައިވާކަމަށް ބެލެވޭ ގިނަ އަދަދެއްގެ މުދާ، ދައުލަތަށް ނެގުމަށް ވެސް ޕީޖީ އޮފީހުން ވަނީ އެދިފަ އެވެ. 

ދައުލަށް ނެގުމަށް އެދިފައިވާ މުދަލާއި ފައިސާގެ ތެރޭގައި؛ 

•  އިސްލާމިކް ބޭންކުގެ އެކައުންޓެއްގައި ހުރި 1,194,290 ރުފިޔާ 

• ހަތަރު ސައިކަލު 

• ފަސް ކާރު 

• ދެ ޕިކަޕް

• އެއް ކަނޑު އުޅަނދު

• 29 ސަންކޮނުއަރ ގުރާ

• ނުވަ ރިންގްނެކް ގުރާ

ފުލުހުން ހިންގި އޮޕަރޭޝަނުގައި ޏ.ފުވައްމުލައް ދޫޑިގަން، ގަސްދޮށުގެ ބަލައިފާސްކުރިއިރު ގިނަ އަދަދެއްގެ މަސްތުވާތަކެތި ފެނުމާގުޅިގެން ތުހުމަތުކުރެވުނު ފަރާތްތަކުގެ ބޭންކް ސްޓޭޓްމަންޓްތައް ދިރާސާކުރިއިރު އެކިއެކި ފަރާތްތަކުން ކުދި އަދަދުތަކުން ފޮނުވާ ފައިސާ، ގަނޑުކޮށް، ޙަސަން އާޒިމްއާއި، އަޙްމަދު ނިއުޝާދުގެ އެކައުންޓުތަކަށް ޖަމާކޮށްފައިވާކަން ތަހުގީގުގައި ފާހަގަކުރެވިފައި ވެއެވެ.

މި މައްސަލާގައި ހިމެނޭ ޙަސަން ޢާޒިމް އިސްވެހުރެ، އަޙްމަދު ނިއުޝާދު އާއެކު ‍މަސްތުވާތަކެތި ވިއްކުމަށްޓަކައި ފުވައްމުލަކު ސިޓީގައި ނެޓްވޯކެއް ގާއިމްކޮށް އެކި ފެންވަރުގައި، އެކި މިންވަރަށް، އެ ތަކެތި ބަންދުކޮށް ބާޒާރަށް ނެރުމުގައި ހަރަކާތްތެރިވާކަމާއި، އެކި ޑީލަރުންނަށް މުސާރަދީގެން، ހަމަޖެހިފައިވާ ތަރުތީބެއްގެ ތެރެއިން އެކި ގަޑިތަކުގައި މަސްތުވާތަކެތި ވިއްކައިގެން ފައިސާ ހޯދާފައިވާކަމަށް ފުލުހުން ކުރި ތަހުގީގުން ހޯދާފައި ވެއެވެ.