ވިލިމާލެ ޕޮލިސް ސްޓޭޝަންގައި ބަހައްޓާފައި ހުރި 31 ކާޓަން ސިނގިރޭޓު ގެއްލުނު މައްސަލައެއް ފުލުހުން ތަހުގީގު ކުރަން ފަށައިފައިވާ ކަމަށް ފުލުހުން ބުނެފި އެވެ. 

މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ، ގާނޫނާ ހިލާފަށް ރާއްޖެއަށް އެތެރެކޮށްފައިވާ ކަމަށް ތުހުމަތުކުރެވިގެން ފުލުހުންގެ ބެލުމުގެ ދަށަށް ގެނައި 32 ކާޓަން ސިނގިރޭޓު ވިލިމާލެ ޕޮލިސް ސްޓޭޝަންގައި ބަހައްޓާފައި ހުއްޓައި އޭގެ ތެރެއިން 6 ކާޓަން ސިނގިރޭޓު ގެއްލިފައިވާ ކަމަށެވެ.

ފުލުހުން ބުނީ އެ ކާޓަންތައް ގެއްލިފައިވާކަން އެނގުނީ، މިދިޔަ ހަފުތާގެ ބުދަ ދުވަހު ކަމަށެވެ. އަދި އެ ތަކެއްޗަކީ ބިދޭސީއެއްގެ އަތުން މިދިޔަ މެއި 23 ގައި ފުލުހުންގެ ބެލުމުގެ ދަށަށް ގެނައި ތަކެތި ކަމަށެވެ. 

ފުލުހުން އިތުރަށް ބުނީ މައްސަލަ ތަހުގީގު ކުރަނިކޮށް، މިދިޔަ އަހަރުގެ ޑިސެމްބަރު 23 ގައި 2 ބިދޭސީއެއްގެ އަތުން ފުލުހުންގެ ބެލުމުގެ ދަށަށް ގެނައި 25 ކާޓަން ސިނގިރޭޓު މަދުވެފައިވާކަން ފާހަގަވެފައިވާ ކަމަށެވެ.  

އެ މައްސަލަތަކާ ގުޅޭ އިދާރީ މައްސަލަ ބަލަމުން ދަނީ ފުލުހުންގެ ސްޓޭޑާޑްސް ކޮމާންޑުން ކަމަށްވާއިރު މައްސަލައިގެ ޖިނާއީ ތަހުގީގު ވަކި މައްސަލައެއް ގޮތުގައި ބަލަމުން އަންނަ ކަމަށް ފުލުހުން ބުންޏެވެ.