ދިރިއުޅޭނެ ދާއިމީ ގެދޮރު ނެތް މީހުންނަށް އިޖްތިމާއީ ބޯހިޔާވަހިކަން ފޯރުކޮށްދިނުމުގެ މަގުސަދުގައި ދޫކުރި ފްލެޓްތައް ކުއްޔަށް ދޫކުރަން އިޝްތިހާރު ޖަހަން ފަށައިފި އެވެ. 

ފަހި ދިރިއުޅުން ކޯޕަރޭޝަނުން އިމާރާތްކުރި 4,000 ފްލެޓް ދޫކުރަން ފެށީ މިދިޔަ މަހު 28 އިން ފެށިގެންނެވެ. ކޮންމެ ރަސްމީ ދުވަހަކަށް ވަކިވަރަކަށް އެޕޮއިންޓްމަންޓް ދޫކޮށްގެން އެއްބަސްވުންތަކުގައި ސޮއިކޮށް ތަޅުދަނޑި ހަވާލުކުރަމުންނެވެ.

މިހާރު ވެސް ދެ ކޮޓަރީގެ އެޕާޓްމަންޓްތަކާއި ތިން ކޮޓަރީގެ އެޕާޓްމަންޓްތައް 20,000 ރުފިޔާއާއި 25,000 ރުފިޔާއާ ދެމެދު ކުއްޔަށް ދޫކުރަން އައިބޭގައި ޖަހާފައިވާ އިޝްތިހާރުތައް ސޯޝަލް މީޑިއާގައި ދަނީ ދައުރު ވަމުންނެވެ.

އެއީ އެ ފްލެޓްތައް ކުއްޔަށް ދޫކުރާ އަގަށްވުރެ ގާތްގަނޑަކަށް 10,000 އާއި 15,000 ރުފިޔާ ބޮޑު އަގެކެވެ. 

ފަހި ދިރިއުޅުން ކޯޕަރޭޝަނަށް ދައްކަން ޖެހޭ ކުއްޔަކީ:

• ދެ ކޮޓަރީގެ އެޕާޓްމެންޓަކަށް މަހު ކުއްޔަށް 7،000 ރުފިޔާ އަދި މެއިންޓެނެންސްއަށް މަހަކު 1،000 ރުފިޔާ؛ ޑައުންޕޭމެންޓަށް 15،000 ރުފިޔާ

• ތިން ކޮޓަރީގެ އެޕާޓްމެންޓަކަށް މަހު ކުއްޔަށް 9،000 ރުފިޔާ އަދި މެއިންޓެނެންސްއަށް މަހަކު 1،500 ރުފިޔާ؛ ޑައުންޕޭމެންޓަށް 25،000 ރުފިޔާ