ރައީސް ޑރ. މުހައްމަދު މުއިއްޒު އަދަދު ނޫހުގެ ނޫސްވެރިޔާ އަދި ސީއީއޯ ހުސައިން ފިޔާޒު މޫސާއަށް އިންޒާރުދެއްވިކަމަށް ބުނެ ފުލުހަށް ހުށަހެޅި މައްސަލާގައި ދައުވާ ނުކުރުމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ނިންމައިފި އެވެ. 

ރައީސް ފިޔާޒަށް ފޯނުން ގުޅުއްވައި ބިރު ދައްކައި އިންޒާރުދީފައިވާ ކަމަށް ބުނެ ފުލުހަށް ހުށަހެޅި މައްސަލަ އެ ހިދުމަތުން ތަހުގީގު ކުރުމަށް ފަހު ދައުވާކުރުމަށް ފޮނުވާފައި ވަނީ އާދީއްތަ ދުވަހު އެވެ. 

ޕީޖީ އޮފީހުން ބުނީ، މި މައްސަލާގައި ފުލުހުން ހޯދާފައިވާ ހެއްކާއި ގަރީނާ ދިރާސާކޮށް ބެލި ބެލުމުން ފިޔާޒަށް ގުޅައި އިންޒާރު ދިން ކަމަށް ގާނޫނީ ގޮތުން މާނަކުރެވޭނެ ފަދަ ބަހެއް ނުވަތަ އިބާރާތެއް ރައީސް ބޭނުންކޮށްފައިވާ ކަން އެނގެން ނެތް ކަމަށެވެ.

އެހެން ކަމުން މި މައްސަލާގައި ދައުވާ ނުކުރުމަށް ނިންމާފައިވާކަމަށް ވެސް ޕީޖީ އޮފީހުން ބުނެފައި ވެއެވެ. 

ކުރީގެ އިންފޮމޭޝަން ކޮމިޝަނަރުކަން ވެސް ކުރެއްވި ފިޔާޒު، މި މައްސަލަ ފުލުހުންނަށް ހުށަހަޅާފައި ވަނީ، ރައީސް ގުޅުއްވައި ދެއްކެވި ވާހަކަފުޅެއްގެ ތެރޭގައި "ގާނޫނީ ގޮތުން އެންމެ ހަރުކަށި ފިޔަވަޅު އަޅުއްވާނެކަމަށް" ބުނެ އެވެ. އަދި އެއީ އިންޒާރެއްގެ ގޮތުގައި މާނަކޮށެވެ. 

ޕީޖީ އޮފީހުން މިކަން ހާމަކޮށް ނެރުނު ބަޔާނާ އެކު އިންޒާރު ދިނުމުގެ ކުށް ގާނޫނުގައި މާނަކުރެވޭ ގޮތް ވެސް ވަނީ ހިއްސާކޮށްފަ އެވެ. 

ގާނޫނުގައި ބަޔާންކޮށްފައިވާ ގޮތުން އިންޒާރެއް ދިންކަމަށް ޤާނޫނީ ގޮތުން ބެލެވޭނީ، މީހަކު ފަރުވާލެއްނެތި ކުރާ އަމަލެއްގެ ސަބަބުން، މީހަކަށް، އޭނާ މަރުވެދާނެކަމުގެ ނުވަތަ އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވައިފިކަމަށް ވާނަމައެވެ. އަދި މީހަކަށް އަނިޔާއެއް ލިބިދާފަދަ ކުށެއް ކޮށްފާނެކަމުގެ ބިރުދެއްކައިފިނަމަ އެވެ. 

ނުވަތަ؛ މީހެއްގެ ފުރާނައަށް ނުވަތަ ހަށިގަނޑަށް ނުވަތަ ޢާއިލާގެ މެންބަރަކަށް ނުވަތަ ތިމާގެ ބެލެނިވެރިކަމުގެ ދަށުގައިވާ މީހަކަށް ގެއްލުމެއް ދީފާނެކަމުގެ ބިރުދައްކައި ނުވަތަ އިންޒާރުދީފައިވާ ނަމައެވެ. 

ޕީޖީ އޮފީހުން ބުނީ މި މައްސަލާގައި އިންޒާރުދިން ކަމުގެ ދައުވާއެއް އުފުލޭނެ ހަމައެއް ނެތް ކަމަށެވެ.