ފިޝަރީޒް މިނިސްޓްރީގެ ޑެޕިއުޓީ މިނިސްޓަރު އަހުމަދު ޝާފިއު މިއަދު އިސްތިއުފާ ދީފި އެވެ.

ޝާފިއު އޭނާގެ ފޭސްބުކްގައި ކުރި ޕޯސްޓެއްގައި ވިދާޅުވީ، މަސްވެރި ސިނާއަތުގެ ކަންކަން ހައްލުކޮށްދެއްވާނެ ކަމުގެ އުންމީދުގައި ފިޝަރީޒް މިނިސްޓްރީގެ ޑެޕިއުޓީ މިނިސްޓަރުކަމުން މިއަދުން ފެށިގެން އިސްތިއުފާދެއްވާފައިވާ ކަމަށެވެ.

ޝާފިއުއަކީ، މަސްވެރި ސިނާއަތަށް ގިނަ ހިދުމަތްތަކެއްކޮށްދެއްވާފައިވާ ބޭފުޅެކެވެ. އެގޮތުން އޭނާ ވަނީ، މަސްވެރިކަން ޕްރޮމޮޓްކުރަން އަމިއްލަ ނޫހެއް އުފައްދަވައި ދިވެހި މަސްވެރިންގެ ޖަމްއިއްޔާ އުފައްދަވައި މަސްވެރިކަމާ ގުޅޭ ބައެއް ފޮތްތައްވެސް ލިޔުއްވާފައެވެ. 

މީގެ އިތުރުން ޝާފިއުއަކީ މަސްވެރިކަމުގައި އަމަލީ ގޮތުން މަސައްކަތްކުރައްވާ އޮޑިވެރިއެއްވެސް މެއެވެ. އޭނާގެ ނައިބު ކަމުގައި މަސްވެރި ވުޒާރާއަށް ވަނީ ހެޔޮ ބަދަލުތަކެއް އައިސްފައެވެ. އެގޮތުން އިހުނަށްވުރެ ބޮޑަށް މަސްވެރިކަމާ ގުޅޭ މައުލޫމާތު ފޯރުކޮށްދިނުމުގައި އޭނާގެ ދައުރު ބޮޑެވެ.