އާބާދީގައި 400 އެއްހާ މީހުން ދިރިއުޅޭ ހދ. ފިނޭގައި ގަސްތައް ކަނޑައި އަންދާ މައްސަލަ ބޮޑުވެއްޖެ އެވެ. 

ފިނޭ ކައުންސިލުން ކުރި އިއުލާނެއްގައި ބުނީ، މިހާރަކަށް އައިސް ރަށުގެ ވަލުތެރޭގައި ހުރި ބޮޑެތި ގަސްތައް ކަނޑައި، އަންދަމުންދާކަން ފާހަގަކުރެވިފައިވާ ކަމަށެވެ.

''ތިމާވެއްޓަށް ނުހަނު ބޮޑެތި ގެއްލުންތަކެއް ލިބޭ މިފަދަ އަމަލުތަކުން ދުރުހެލިވުމަށް އެންމެހައި ފަރާތްތަކަށް މި ކައުންސިލުން އިލްތިމާސްކުރަމެވެ'' ކައުންސިލުން ބުނީ  އެފަދަ ކަންކަމަކީ ރަށުގެ ގުދުރަތީ ރީތިކަން ގެއްލި، މޫސުމީ ބަދަލުތަކުގެ ނޭދެވޭ އަސަރު ރަށަށް އިތުރުވެގެންދާނެ ކަމަށެެވެ.

އެހެންކަމުން، ރަށުގެ ފެހިކަން ދަމަހައްޓައި، އަންނާން އޮތް ޖީލުތަކަށް ރައްކާތެރި މާހައުލެއް ފޯރުކޮށްދިނުމަށްޓަކައި އެންމެހައި ރައްޔިތުންގެ އެއްބާރުލުމަށް ފިނޭ ކައުންސިލުން ވަނީ އެދިފަ އެވެ.