މީގެ ކުރިން އިގުތިސޯދީ ވުޒާރާގެ ދަށުން ހިންގަމުން އައި "މޯލްޑިވްސް އިންޓަނޭޝަނަލް ފިނޭންޝަލް ސާވިސަސް އޮތޯރިޓީ" މާލީ ވުޒާރާގެ ދަށުން ހިންގާ ތަނެއްގެ ގޮތުގައި ރައީސް ޑރ. މުހައްމަދު މުއިއްޒު ކަނޑައަޅުއްވައިފި އެވެ. 

އެމަނިކުފާނު މިގޮތަށް ހަމަޖައްސަވާފައިވަނީ، ގާނޫނުއަސާސީގެ 116 ވަނަ މާއްދާގެ (ހ) އިން ލިބިވަޑައިގަންނަވާ އިހުތިޔާރުގެ ދަށުންނެވެ.

މިކަން ނިންމެވީ ރާއްޖޭގައި އިންޓަނޭޝަނަލް ފިނޭންޝަލް ސެކްޓަރެއް (ބައިނަލްއަގުވާމީ މާލީ ސިނާއަތެއް) ތަރައްގީ ކުރުމަށް ޓަކައި ކަމާ ބެހޭ ފަރާތްތަކުން ކޮށްފައިވާ ދިރާސާތަކުން، އިންޓަނޭޝަނަލް ފިނޭންޝަލް ސެންޓަރުތަކުން ހިންގާ މާލީ ހަރަކާތްތައް ރެގިއުލޭޓު ކުރުމުގެ މަސައްކަތްތައް، މާލީ އަދި ޕްލޭނިންގެ ވުޒާރާގެ ދަށުން ހިނގާ އިދާރާއަކުން ކުރުމަށް ދީފައިވާ ލަފާގެ މަތިންނެވެ.

މި ބަދަލު ގެނައީ މިދިޔަ އަންގާރައިން ފެށިގެން ކަމުގައި ރައީސް އޮފީހުން ބުނެ އެވެ.