ފިލްމީ އަދި މުނިފޫހިފިލުވުމުގެ ސިނާއަތުގައި ވެސް މަސައްކަތްކުރައްވާ ބޭފުޅުން އިސްލާމް ދީނުގެ ހުދޫދުން ބޭރުގައިވާ ކަންކަން ނުކުރުމަށް ރައީސް ޑރ. މުހައްމަދު މުއިއްޒު ގޮވާލައްވައިފި އެވެ. 

މި ވީ ގޮތަކީ ރޭ އޮތް 'ލިލީ' ފިލްމުގެ ޕްރެމިއާ ނައިޓަށް ބައެއް ފަންނާނުން ހެދުން އަޅާފައި ތިބި ގޮތާ ގުޅޭ ގޮތުން ސޯޝަލް މީޑީއާގައި ގިނަ ބަޔެއްގެ ފާޑުކިއުން އަމާޒުވި އެވެ. މީގެ ކުރިން ވެސް ބައެއް ފިރިހެން ފަންނާނުންގެ ހެދުން، އަންހެނުން އާންމުކޮށް އަޅާ ހެދުމާ ގުޅުވާފައި މީހުންގެ ފާޑުކިއުން އަމާޒުވެފައި އެބަ ހުއްޓެވެ. 

މި ފަހަރު ސޯޝަލް މީޑިއާގައި މީހުންގެ ފާޑުކިއުންތަކެއް އައި ކަންތަކުގެ ތެރެއަށް ވަދެވަޑައިގަތީ ސީދާ ދައުލަތުގެ އެންމެ އިސް ވެރިޔާ، ރައީސުލްޖުމްހޫރިއްޔާ އެވެ. 

"އަޅުގަނޑުމެންނަކީ ސައްތައިން ސައްތަ މުސްލިމު ގައުމެއް ކަމުން އިސްލާމް ދީނުގެ ގިއުގަނޑުގެ ތެރޭގައި އަޅުގަނޑުމެންގެ އަމަލުތައް ބެހެއްޓުމަކީ ރާއްޖޭގެ ކޮންމެ ރައްޔިތަކު އުފަލާއެކު ކުރަން ވާނެ ކަމެއް," ރައީސްގެ ޕޯސްޓް ފެއްޓެވީ މިހެންނެވެ.

އެމަނިކުފާނުގެ ޕޯސްޓްގައި ދެން ލިއުއްވާފައިވަނީ މުސްލިމުންގެ ސަގާފަތާ ޚިލާފު ކަންކަމާ ދުރުވާން ޖެހޭ ކަމަށެވެ. އަދި ފިލްމީ ސިނާއަތުގެ ބޭފުޅުންގެ އަރިހުން ވެސް އެ ކަމަށް ރައީސް އެދިވަޑައިގެންނެވި އެވެ.

"ފިލްމާއި މުނިފޫހިފިލުވުމުގެ އިންޑަސްޓްރީގެ ބޭފުޅުންގެ އަރިހުން ވެސް އަޅުގަނޑު އެދެނީ އިސްލާމްދީނުގެ ޙުދޫދުން ބޭރުވާ ގޮތައް ކަންކަން ނުކުރެއްވުމަށް،" ގައުމިއްޔަތުގެ ފިކުރެއް ފެތުރުމަށް ވަކާލާތުކުރައްވާ މުއިއްޒު ވިދާޅުވި އެވެ.

ރައީސް ވިދާޅުވީ ހެދިބޮޑުވަމުން އަންނަ ޖީލަށް އިސްލާމީ ސަގާފަތާ އެއް ގޮތަށް ހެޔޮ ނަމޫނާ ދައްކާ ބަޔަކަށް ދިވެހިން ވުމަކީ މި ގައުމަށް ޓަކައި ކޮށްދެވޭނެ އެންމެ އަގުހުރި ޚިދުމަތް ކަމަށެވެ.