އއ. ރަސްދޫއިން ފިހިގެން މާލެ ގެނައި ދެމީހުންގެ އާއިލާއާ ނައިބު ރައީސް ހުސައިން މުހައްމަދު ލަތީފް ބައްދަލުކުރައްވައިފިއެވެ. 

ރަސްދޫއިން ފިހިގެން މާލެ ގެނައި ދެ މީހުންގެ އާއިލާއާ ބައްދަލުކުރެއްވުމަށް ނައިބު ރައީސް މިއަދު ހަވީރު ވަނީ އެ މީހުންނަށް ފަރުވާ ދެމުން އަންނަ އައިޖީއެމްއެޗަށް ވަޑައިގެންފައެވެ. 

ހޯމަ ދުވަހުގެ ރޭ ރަސްދޫގެ ގެއެއްގެ ކޮޓަރިއެއްގައި ހިނގި އަލިފާނުގެ ހާދިސާގައި، އަންހެނަކާއި ފިރިހެނަކު ވަނީ ވަރަށް ބޮޑަށް ފިހިފައެވެ. 

ފިހިގެން މާލެ ގެނައި ދެމީހުންގެ ތެރޭގައި ހިމެނެނީ 31 އަހަރުގެ ފިރިހެނަކާއި ހަމަ އެ އުމުރުގެ އަންހެނެކެވެ. މި ދެ މީހުންގެ ފަސް އަހަރު ފުރިފައިވާ ކުއްޖަކު ހުންނަ އިރު، ހާދިސާ ހިނގި ވަގުތު އެ ކުއްޖާ ކޮޓަރީގައި ނެތް ކަމަށްވެއެވެ. 

މިހާރު އެ މީހުންނަށް އައިޖީއެމްއެޗްގެ އައިސީޔޫގައި ފަރުވާ ދެމުން އަންނަ އިރު ދެމީހުންގެ ހާލު ވެސް ދެރައެވެ.