ފުޓުބޯޅައާ ބެހޭ މައި އިދާރާ (ފީފީ) އިން ރާއްޖޭގެ ފުޓްބޯޅައިގެ އިދާރާ (އެފްއޭއެމް) ގައި ހުންނާނީ ދިވެހީންގެ ފައިސާ ކަމަށާއި ކުރީގެ ޕްރޮސެކިއުޓަ ޖެނެރަލް (ޕީޖީ) ހުސެން ޝަމީމް މިއަދު ވިދާޅުވެއްޖެ އެވެ.

ހިޔާނާތާއި މަނީ ލޯންޑަރިންގެ ދައުވާކޮށްފައިވާ  އެފްއޭއެމްގެ ކުރީގެ ރައީސް ބައްސާމް އަދީލް ޖަލީލު ، މައްސަލައެއްގައި އޭނާގެ ދިފާއުގައި ނަގާ ނުުކުތާއަކީ ފީފާއިން ދޭ ފައިސާގެ މައްސަލައެއް އެ އިދާރާގެ ހުއްދަ ނެތި ނުބެލޭނެ ކަމަށެވެ.

ކްރިމިނަލް ކޯޓުން އެ ދިފާއު ބަލައިނުގަތެވެ.

އެހެންވެ 9 އަހަރަށް ޖަލަށްލާފައިވާ ބައްސާމްގެ ފަރާތުން ދަށު ކޯޓުގެ އެ ނިންމުން މިހާރު ވަނީ ހައި ކޯޓުގައި އިސްތިއުނާފު ވެސް ކޮށްފަ އެވެ. 

އެ މައްސަލާގައި ކުރީގެ ޕީޖީ ޝަމީމް އޭނާގެ ބޮލްގްގައި ލިޔުނު އާޓިކަލެއްގައި ވިދާޅުވީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލުގެ މައްޗަށް، އެފްއޭއެމްގެ ފައިސާއަށް ހިޔާނާތްތެރިވި ކަމަށް ތުހުމަތުކުރެވޭ މައްސަލައަކީ އޭނާ ޕީޖީ ކަމުގައި ހުރިއިރު ތަހުގީގުކޮށް، ދަޢުވާ އުފުލުނު މައްސަލައެކެވެ.

އެ މައްސަލައިގެ ޝަރީޢަތުގައި މިހާރު ކުރެވޭ އެއް ސުވާލަކީ ''ފީފާގެ ފައިސާގެ މައްސަލަ ރާއްޖޭގެ އިދާރާތަކަށް ބެލޭނެތޯ ނުވަތަ ނޫންތޯއެވެ؟'' ޝަމީމް ވިދާޅުވި އެވެ.