ފީފާގެ ރައީސް ޖިއާނީ އިންފަންޓީނޯ މާދަމާ ރާއްޖެ އަށް ރަސްމީ ދަތުރެއްގައި ވަޑައިގަންނަވާ ގޮތަށް ހަމަޖެހިއްޖެ އެވެ.

ފީފާގެ ރައީސްގެ ދަތުރުފުޅުގައި މާދަމ ޑރ. މުހައްމަދު މުއިއްޒުއާ އެކު ހަވީރު ހާއްސަ ފުޓްބޯޅަ މެޗެއްގައި ބައިވެރިވަޑައިގަންނަވާ ގޮތަށް ހަމަޖެހިފައިވެ އެވެ.

މެޗުގެ ކުރިން މާދަމާ ހެނދުނު ވަޑައިގެން އިންފަންޓީނޯގެ ރައީސާ އެކު ރަސްމީކޮށް ބައްދަލުކުރައްވާނެ އެވެ. އެފްއޭއެމުން ބުނީ އެ ބައްދަލުވުމުގައި ދެ ބޭފުޅުން ރާއްޖޭގެ ފުޓްބޯޅައިގެ ކުރިއެރުވުމާ ބެހޭގޮތުން ވާހަކަދައްކަވާނެ ކަމަށެވެ.

ހާއްސަ ފުޓްބޯޅަ މެޗު އޮންނާނީ މާދަމާ ހަވީރު 6-4 އަށް ގަލޮޅު ދަނޑުގައި ބާއްވާ އެގްޒިބިޝަނުގެ ތެރެއިންނެވެ. މި ހަރަކާތުގައި، ރާއްޖޭގެ ޔޫތު ޓީމުތަކާއި، އެކަޑަމީތަކުގެ ޓީމުތަކުގެ މެދުގައި ވެސް މެޗުތައް ކުޅޭނެ އެވެ.

އެފްއޭއެމުން ވަނީ ރާއްޖޭގެ ފުޓްބޯޅަ އާއިލާގެ މެމްބަރުންނާއި، ފުޓްބޯޅަ އަށް ލޯބިކުރާ މީހުންނާއި، ހެޔޮއެދޭ ފަރާތްތަކައް މި ހަރަކާތުގައި ބައިވެރިވުމަށް ދަނޑަށް އައުމަށް ދައުވަތު ދީފަ އެވެ.

އިންފަންޓީނޯ ރާއްޖެއިން ފުރާވަޑައިގަންނަވާނީ މާދަމާ ރޭ އެވެ.