ސްރީލަންކާގައި ބޭއްވި ފެތުމުގެ ޗެމްޕިއަންޝިޕް މުބާރާތަކުން ދަނިޔަލް އަމީން ފައިސަލް ރާއްޖެއަށް ރިހި މެޑަލް ހޯދައިދީފި އެވެ.

ދަނިޔަލް ވަނީ އެ ޤައުމުގައި ކުރިއަަށްދިޔަ 49 ވަނަ ޤައުމީ ފެތުމުގެ ޗެމްޕިއަންޝިޕް މުބާރާތުން ދެވަނަ ހޯދާފަ އެވެ.

މި މުބާރާތުގައި އޭނާއާއެކު ރާއްޖޭގެ ފަރާތުން ދެން ބައިވެރިވީ އަލްފީ، ޒާކިން އަދި އަލްޔާން އެވެ. އެގޮތުން މި ހަތަރު ބައިވެރިން ވެސް ވަނީ މި މުބާރާތުގެ ޔޫ15 ކެޓަގަރީން 100 މީޓަރު ބައިން ފަޚުރުވެރި ވަނަތައް ހާސިލު ކޮށްފައެވެ.

ދަނިޔަލް ވަނީ މި މުބާރާތުގެ 100 މީޓަރާއި 50 މީޓަރުގެ ބަޓަރފްލައި ބައިން ދެވަނަ (ރިހި މެޑަލް) ހާސިލު ކޮށްފައެވެ. މީގެއިތުރުން 100 މީޓަރުގެ ފްރީސްޓައިލް ބައިން އޭނާ ވަނީ ހަތަރު ވަނަ ހާސިލުކޮށް 200 މީޓަރުގެ އިންޑިވިޖުއަލް މެޑްލޭ ބައިގެ ފައިނަލާ ހަމައަށް ދަތުރު ކޮށްފައެވެ.

މި މުބާރާތުގައި ބައިވެރިވީ ހަތަރު ބައިވެރިން ވެސް ވަނީ އެކުދިންގެ މޮޅު ހުނަރާއެކު ގަދަ 10އާ ހަމައަށް ދަތުރުކޮށް، ރާއްޖެއަށް ފަޚުރުވެރި ނަމެއް ހޯދައިދީފައެވެ.