އެކްޓިން ޑެޕިއުޓީ ކޮމިޝަނަރު ފަރުހާދު ފިކުރީގެ ދަރިފުޅަށް ތުހުމަތުކުރި ސީރިއަސް މައްސަލައެއްގައި ހެކި ނައްތާލި ކަމަށް ތުހުމަތު ކުރެވޭ މައްސަލަ ފަރުހާދުގެ މައްޗަށް ސާބިތުނުވާ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.

މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ، ފަރުހާދުގެ މައްޗަށް ކުރެވޭ ތުހުމަތުތަކާ ގުޅޭގޮތުން އެ މައްސަލަ ކަމާ ބެހޭ މުއައްސަސާތަކުން މިހާރު ބަލާފައިވާ ކަމަށެވެ.

އަދި އެއިން އެއްވެސް މުއައްސަސާއަކުން އޭނާއާ މެދު އެއްވެސް ފިޔަވަޅެއް އެޅިކަން އަންގާފައިނުވާ ކަމަށާއި، އަދި އެ މައްސަލައަކީ އޭނާގެ މައްޗަށް ސާބިތު ނުވާ މައްސަލައެއް ކަމަށް ކަނޑައަޅާފައިވާ ކަމަށް މިނިސްޓަރު ވިދާޅުވި އެވެ.

ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ (241) ކޮމިޓީއަށް ފޮނުވި ސިޓީއެއްގައި ވަނީ ފަރުހާދުގެ މައްޗަށް ބޮޑު ތުހުމަތެއް ކޮށްފައެވެ. އެއީ އޭނާގެ ފިރިހެން ދަރިފުޅު، 18 އަހަރުން ދަށުގެ ކުއްޖަކު ރޭޕް ކުރި މައްސަލައިގައި ތަހުގީގަށް ހޯދާފައި ހުރި ހެކިތަކެއް މަގާމުގެ ނޫފޫޒު ބޭނުންކޮށްގެން ފަރުހާދު ނައްތާލި ކަމުގެ ތުހުމަތެވެ.