ފަންނުވެރި ވިސްނުންތަކާއެކު 'ކުރިއަށް' ދާން 'ކުރިއަށް' މީޑިއާ ޕްލެޓްފޯމް މިރޭ ލޯންޗުކޮށްފި އެވެ.

‎1 މާޗު 2025 އިން ފެށިގެން، 'ކުރިއަށް' މީޑިއާ ދަނީ ދިވެހި މީޑިއާއަށް އާ އަޑެއް ގެނައުމަށް ތައްޔާރަށެވެ. އެއީ ބިރުން ނުސިހޭނެ، މުހިންމު ވާހަކަތައް ކިޔައިދިނުމަށް ވައުދުވެފައިވާ ޒުވާން އަޑެކެވެ.

ރާއްޖޭގައި ވެސް ތަފާތު ގިނަ ވާހަކަތައް އެބަހުއްޓެވެ. ދިރިއުޅުމުގައި ދިމާވާ ދަތިތައް، އުނދަގޫތައް ތިލަނުކޮށްދެވި އެބަހުއްޓެވެ. މުހިންމު ހިޔާލުތަކަށް ޖާގަ ނުދެވި ވެސް އެބަހުއްޓެވެ. ގައުމީ ރޫހުގެ ފިކުރުތަކުގެ އަޑު މަޑޭ ބުނެވިދާނެ އެވެ.

މިއީ ޒަމާނީ ވަސީލަތްތަކާއެކީ، އަލަށް ފަށާ ނޫސްވެރިންނާއި ކޮންޓެންޓް ކްރިއޭޓަރުންނަށް މިފަދަ ވާހަކަތައް ގެނެސްދިނުމަށް ލިބޭނެ ޕްލެޓްފޯމެކެވެ. މިއީ އެ ވާހަކަތައް ގެނެސްދިނުމަށް ލިބޭނެ އެންމެ ބޮޑު އެއް އުންމީދެވެ.

މި މީޑިއާއަކީ ރާއްޖޭގެ މީޑިއާ އާ ގޮތަށް މާނަކުރުމަށް، ކުޑަ ނަމަވެސް ޖޯޝެއް ބޭނުންވާ ކަމަށް ބަޔަކަށް މި ފިކުރު ގަބޫލުކުރެވިގެން ކުރަން ފެށި މަސައްކަތެއްގެ ނަތީޖާ އެވެ.

ފުނަށް ވިސްނައިގެން، ރާއްޖޭގެ ހުރި ވާހަކަތައް ތަފާތު ގޮތަކަށް ގެނެސްދިނުމަށް 'ކުރިއަށް' ގެ ލީޑާޝިޕް - އަހުމަދު އަލީ، މުހައްމަދު ނާއިލް، މުހައްމަދު އާދިން މޫސާ ލަތީފް، އަދި މުހައްމަދު އަދުހަމް' އެއް މިސްރާބަކަށް ދާން މި ފެށީ އުންމީދީ ދަތުރެކެވެ.

‎ރާއްޖޭގެ މި ވަގުތު އޮތް މީޑިއާގެ ޑިޖިޓަލް ޕްލެޓްފޯމްތަކުގައި ވާހަކަތައް ގެނެސްދިނުމަށް ތަފާތު ހުނަރާއި ފަންނުވެރި ވިސްނުންތައް މަދުކަމަށް ފެނިގެން، އެ ކަން 'ކުރިއަށް' ގެނެސްދީ ކުރިއަރުވާން ބޭނުންވެގެނެވެ.

‎"ކުރިއަށް މީޑިއާގެ ޚިޔާލު އުފެދުނީ ގިނަ ރޭގަނޑުތަކެއްގެ މަޝްވަރާތަކާއި، ބަހުސްތަކާއި، ވިސްނުންތަކަކަށް ފަހުގައެވެ. މަގުސަދު ސާފެވެ: ހިތްވަރުގަދަ، ވިސްނުންތެރި އަދި ތެދުވެރިކަމާއިއެކު ކުރިއަށްދާ ޕްލެޓްފޯމެއް އުފެއްދުން،" ކުރިއަށް މީޑިއާގެ މެނޭޖިންގ ޑިރެކްޓަ އަހުމަދު އަލީ ވިދާޅުވި އެވެ.

ޑިޖިޓަލް-ފަސްޓް މީޑިއާ ކުންފުންޏެއްގެ ތަސައްވުރާއެކީ، "ކުރިއަށް" މި ނަން ހޮވުނީ ޓީމުގެ ކުރިއަރާފައިވާ ނޫސްވެރިކަމުގެ އުސްލޫބު - ތޫނު، ސީދާ އަދި އަސަރުގަދަ - ދައްކުވައިދިނުމަށެވެ.