ޒުވާނުންނަށް އަމާޒުކޮށްގެން ޒުވާނުންނާއި ފަންނުވެރިންގެ ވުޒާރާއިން ކުރިއަށްގެންދާ "ފަންނީ އުފާ" މި އަހަރު ކ. ތުލުސްދޫގައި ބޭއްވުމަށް ނިންމައިފި އެވެ.

މި ހަރަކާތް ބޭއްވުމަށް ނންމާފައިވަނީ މި މަހުގެ 21 ވަނަ ދުވަހުގެ ހަވީރު 4:00 އިން ރޭގަނޑު 11:00 އަށެވެ.

ޒުވާނުންގެ ވުޒާރާއިން ބުނީ އުމުރުން 18 އަހަރާއި 35 އަހަރާ ދެމެދުގެ ޒުވާނުންނަށް ހާއްސަކޮށްގެން ބާއްވާ އެ ޕްރޮގްރާމްގައި ޒުވާން ފަންނުވެރިންގެ އެކި ހުނަރުތަކާއި ހަރަކާތްތައް ދައްކާލާނެ ކަމަށެވެ.

މި ހަރަކާތުގައި ބައިވެރިވުމަށް އެކަމަށް ހާއްސަކޮށްފައިވާ ކިއުއާރް ކޯޑު ބޭނުންކޮށްގެން ރަޖިސްޓްރީވެވޭނެ އެވެ.

'ފަންނީ އުފާ'އަކީ ޒުވާނުންނަށް އަމާޒުކޮށްގެން ފަންނުގެ ދާއިރާއިން ޒުވާނުން ބާރުވެރިކުރުމަށް އަދި އެފަރާތްތަކުގެ ހުނަރު ގިނަ ބަޔަކަށް ދައްކާލުމުގެ ގޮތުން ކުރިއަށްގެންދާ ހަރަކާތްތަކެވެ.

މި ޕްރޮގްރާމުގެ ތެރެއިން މުޖުތަމައުގައި މިހާރު ނެތެމުން އަންނަ ދިވެހި ސަގާފަތް ކުރިއަރުވައި އާލާކުރުމަށްޓަކައި އެކުވެރި އުފާވެރި މާހައުލެއްގައި ހަރަކާތްތަކެއް ކުރިއަށް ގެންދިއުމުގެ ގޮތުން ބާއްވާ ހަރަކާތެއް ކަމަށް ވެސް ވުޒާރާއިން ބުންޏެވެ.