ރާއްޖޭގެ ކަނޑުގެ ސަރަހައްދުގައި އަޅާފައި އޮންނަ އުޅަނދުފަހަރު ކަނޑުގައި އަޅަފައި އޮންނަ ވަގުތު ފަޅުވެރިން ނުތިބޭނަމަ ފިޔަވަޅު އަޅާނެކަމަށް ޓްރާންސްޕޯޓް މިނިސްޓްރީން ބުނެފިއެވެ.

ޓްރާންސްޕޯޓް މިނިސްޓްރީން ބުނީ މިހާރަކަށް އައިސް ކަނޑުއުޅަނދުފަހަރު ފަޅަތެރޭގައްޔާއި ކަނޑުގެ ސަރަހައްދުގައި ނަގިލިލުމަށް ފަހު އެ އުޅަނދުތައް ބެލެހެއްޓުމަށް ފަޅުވެރިއަކު ނުލާ ދޫކޮށްލުމުގެ ސަބަބުން ނުރައްކާތެރި ގިނަ ހާދިސާތައް ހިނގާފައިވާ ކަމަށެވެ. މި ނިންމުމަކީ އެ ފަދަ ހާދިސާތައް ދިމާވުމަށް މެދުވެރިވާ ކަންތައްތަކަށް ހައްލެއް ގެނައުމަށް ނިންމި ނިންމުމެއްކަމަށް އެ މިނިސްޓްރީން ވިދާޅުވެފައިވެއެވެ.

އޭގެ އިތުރުން ޓްރާންސްޕޯޓް މިނިސްޓްރީން ވިދާޅުވެފައިވަނީ ކަނޑު ސަރަހައްދުގައި އަޅާފައި އޮންނަ އުޅަނދުފަހަރު ތަކުގައި ފަޅުވެރިއެއް ނެތުމުގެ ސަބަބުން ދިމާވާ ނުރައްކާތެރި ހާދިސާތަކުގައި ގެއްލުއްވާ އުޅަނދު ތަކުގައި ހުންނަ މީހުންގެ މުދަލަށް ގެއްލުން ވަމުންދާކަމަށެވެ. އެ ގެނެވުނު ބަދަލާ ގުޅިގެން ލިބޭ ގެއްލުންތައް ކުޑަކުރެވިގެންދާނެކަމަށް އެ މިނިސްޓްރީން ބުންޏެވެ.

ޓްރާންސްޕޯޓް މިނިސްޓްރީން އިތުރަށް ބުނީ، ރާއްޖޭގެ ކަނޑުގެ ސަރަހައްދުގައި ދުއްވާ އުޅަނދުފަހަރު ނަގިލިފާފައި ނުވަތަ ޖެޑީގައި އޮންނަ ވަގުތު ތަކުގައި އެ އުޅަދެއް ބެލެހެއްޓުމަށްޓަކައި އެކަށީގެންވާ އަދަދަށް ފަޅުވެރިން ތިބުމަކީ ސަލާމަތާއި ރައްކާތެރިކަމުގެ ގޮތުން ކޮންމެހެން ލާޒިމް ކަމެއް ކަމަށެވެ. 

މިއާއެކު ނަގިލި ލާފައިި ހުންނަ އުޅަނދުފަހަރު ބެލެހެއްޓުމަށް ބޭނުންވާ އަދަދަށް ފަޅުވެރިން ނުތިބޭނަމަ އެ އުޅަނދެއްގެ ވެރިފަރާތާއިމެދު "ދިވެހިރާއްޖޭގެ ކަނޑުގެ ސަރަހައްދުގައި ދަތުރުކުރާ އުޅަނދުފަހަރުގެ ސަލާމަތާއިބެހޭ ގަވާއިދު" R-229/2015 ގެ 44 ވަނަ މާއްދާގެ "ފ" ގެ ދަށުން ފިޔަވަޅަ އަޅާނެކަމަށް ޓްރާންސްޕޯޓް މިނިސްޓްރީން ބުންޏެވެ.