ސަރުކާރު އޮފީސްތަކުގައި މަސައްކަތްކުރާ މުވައްޒަފުން ރަމަޟާން މަހުގެ ފަހު ދިހައެއްގައި އެ އޮފީސްތަކުން ކޮންމެހެން ދޭންޖެހޭ ހިދުމަތްތައް ދިނުމަށް މަސައްކަތަށް  ނުކުންނަ މުވައްޒަފުންނަށް ހާއްސަ އިނާޔަތެއް ދޭ ގޮތަށް ޕޭ ފްރޭމްވޯކަށް އިސްލާހެއް ގެނެސްފިއެވެ.

ސަރުކާރުގެ ގެޒެޓުގައި މިހާރު ޝާއިއުކޮށްފައިވާ އިއުލާނުގައި ބުނާގޮތުން ހިނގަމުން މިދާ ރަމަޟާން މަހުގެ ފަހު ދިހައިގެ ދުވަސްތަކަކީ ރަސްމީ ބަންދު ދުވަސްތަކަށްވާތީ އެ ދުވަސްތަކުގައި ވަޒީފާއަށް ނުކުންނަ މުވައްޒަފުންނަށް މުސާރައިން ދުވާލަކަށްޖެހޭ މިންވަރުގެ ދެ ބައިކުޅަ އެއްބަޔާ އެއްވަރުގެ އިނާޔަތެއް ދޭންޖެހޭ ގޮތަށް ޕޭ ފްރޭމް ވޯކަށް އިސްލާހު ވަނީ ގެނެސްފައެވެ.

މިއާއެކު ރަމަޟާން މަހުގެ ފަހު ދިހައެއްގައި އިތުރު ގަޑީގެ މަސައްކަތަށް ނުކުންނަ މީހުނަށް މުސާރަދިނުމުގައި ހިސާބު ކުރަންވާނީވެސް ވަޒީފާއާ ބެހޭ ގާނޫނުގައި ބަޔާންކޮށްފައިވާ ރަސްމީ ބަންދު ދުވަސްތަކުގައި ކަންތައްކުރަންޖެހޭ ގޮތަށް ގެނެސްފައިވާ އިސްލާހާ އެއްގޮތަށް ކަމަށްވެސް އިއުލާނުގައިވެއެވެ. 

މީގެ އިތުރުން މަގާމަށް ކަނޑައަޅާފައިވާ މުސާރައާއި އިނާޔަތުގެ މިންގަނޑުގައި އެހެން ގޮތަކަށް ބަޔާންކޮށްފައި އޮތް ނަމަވެސް، ދައުލަތުގެ ޕޭ ފްރޭމްވޯކަށް ބަދަލުވެފައިވާ މުވައްޒަފުންނަށް ރަމަޟާން މަހުގެ 20 ވަނަ ދުވަހުން ފެށިގެން މި މަހުގެ ނިޔަލަށް ހިމެނޭ ދުވަސްތަކުގެ ތެރެއިން ހުކުރު އަދި ހޮނިހިރު ދުވަސްތައް ފިޔަވައި އެހެން ދުވަސްތަކުގައި އެ މުވައްޒަފުން އޮފިހަށް ހާޒިރުނުވި ނަމަވެސް ހާޒިރީ އިނާޔަތް ދޭންވާނެ ކަމުގައި އިއުލާނުގައިވެއެވެ.