ފަހި ދިރިއުޅުން ކޯޕަރޭޝަން (އެފްޑީސީ)ގެ ދަށުން މިދިޔަ ސަރުކާރުން އެޅި 4000 ފްލެޓްތަކުގެ ސެކިއުރިޓީ ޑިޕޮސިޓާއި ކުލި މިއަދުން ފެށިގެން ކުޑަކޮށްފައި ވާތީ މިހާތަނަށް ޑިޕޮސިޓް ދެއްކި މީހުންގެ ފައިސާ ކުލިން އުނިކޮށްދޭން ހައުސިން މިނިސްޓްރީން ނިންމައިފި އެވެ.

ހައުސިން މިނިސްޓްރީން ބުނީ ޑިޕޮސިޓް ކުޑަކުރުމުގެ ސަބަބުން ކުރިން އެ ދައްކައި ނިންމައިފައިވާނަމަ، އެ ފައިސާއިން ކުޑަވި އަދަދު އުނިކުރާނީ ދެން ދައްކަންޖެހޭ މަސްތަކުގެ ކުލިން ކަމަށެވެ.

ސަރުކާރުން ނިންމާފައިވަނީ 2 ކޮޓަރީގެ އެޕާޓްމަންޓުތަކަށް ސެކިއުރިޓީ ޑިޕޮސިޓުގެ ގޮތުގައި 15،000ރ ދެއްކި މީހުންގެ އަތުން ކުޑަކުރި ޑިޕޮސިޓް ފައިސާ ކަމަށްވާ 6،000ރ އުނިކޮށް ބާކީ ހުރި ފައިސާ ކުރިއަށް ހުރި މަސްތަކުގެ ކުލިން ކެނޑޭ ގޮތަށެވެ.

އަދި 3 ކޮޓަރީގެ އެޕާޓްމަންޓުގެ ސެކިއުރިޓީ ޑިޕޮސިޓުގެ ގޮތުގައި 25،000ރ ދެއްކި މީހުންގެ އަތުން ކުޑަކުރި ޑިޕޮސިޓް ފައިސާ ކަމަށްވާ 8،500ރ އުނިކޮށް ބާކީ ހުރި ފައިސާ ކުރިއަށް ހުރި މަސްތަކުގެ ކުލިން ކެނޑޭ ގޮތަށެވެ. 

މީގެ ކުރިން އޮތް ގޮތުން 2 ކޮޓަރީގެ ފްލެޓުތަކަށް މެއިންޓެނަންސް ފީއާ އެކު މަހަކު 8،000ރ. ދައްކަން ޖެހޭނެ އެވެ. އަދި 3 ކޮޓަރީގެ ފްލެޓްތަކަށް މެއިންޓެނަންސް ފީއާ އެކު، މަހަކު ދައްކަން ޖެހެނީ 10،500ރ އެވެ.