ފަހަތުންއަރައި ބޯންމައުތު ބަލިކޮށް މެންޗެސްޓާ ސިޓީން އެފްއޭކަޕް ސެމީ ފައިނަލަށް ދަތުރުކޮށްފިއެވެ.

ރޭ ބޯންމައުތު ދަނޑުގައި ކުޅުނު އެ މެޗު ސިޓީން ކާމިޔާބުކުރީ ބޯންމައުތުން ގޯލެއްޖަހައިފައިވަނިކޮށް ފަހަތުންއަރައި 2 ގޯލު ޖަހައި 2-1 ގެ ނަތީޖާއަކުންނެވެ.

އެ މެޗުގައި ފުރަތަމަ ގޯލު ޖަހާނެ އެންމެ ހުސް ފުރުސަތު މެޗުގެ 14 ވަނަ މިނެޓުގައި ލިބުނީ ސިޓީގެ އާލިން ހާލަންޑަށެވެ. ބޯންމައުތު އޭރިއާތެރެއިން އެ ޓީމުގެ ޓައިލީ އެޑަމް އަތުގައި ބޯޅަ ޖެހުމުން ދިން ޕެނަލްޓީ ހާލަންޑު ފޮނުވާލި ނަމަވެސް އެ ބޯޅައިގެ ހުރަހަކަށްވީ މެޗުގައި މޮޅު ކުޅުމެއްދެއްކި  ބޯންމައުތުގެ ކީޕަރު ކެޕާ އަރިޒަބަލަގައެވެ.

ސިޓީން އެ ހުސްފުރުސަތު ނަގާލުމުން ކުރިއަށް ޖެހިލައި ބޯންމައުތުން އުފެއްދި ހަމަލާއިން އެ ޓީމުން ވަނީ ގޯލު ޖަހައިފައެވެ. ޖަސްޓިން ކުލެވާޓް ތަނަވަސްކުރި ފުރުސަތަކުން އެ ގޯލު ޖެހީ އެވަނިލްސަންއެވެ.

މެޗުގެ ފުރަތަމަ ހާފު ބޯންމައުތު ކުރީގައި އޮވެގެން ނިމުނު ނަމަވެސް ދެވަނަ ހާފު ފަށައިގެން ހަތަރު ވަނަ މިނެޓުގައި ހާލަންޑު ވަނީ ސިޓީއަށް ނަތީޖާ ހަމަހަމަކޮށްދީފައެވެ.

މެޗުގެ 63 ވަނަ މިނެޓުގައި ނިކޯ އޯރެއިލީ ތަނަވަސްކުރި ފުރުސަތަކުން އޮމާ މާމޮޝް ވަނީ ސިޓީއަށް މެޗުގެ ލީޑު ނަގައިދީފައެވެ.

ސިޓީން އެފްއޭކަޕް ސެމީއަށް ދަތުރުކުރިއިރު، ސިމީގައި އެ ޓީމު ވާދަކުރަން ޖެހޭނީ ނޮޓިންހަމް ފޮރެސްޓާއެވެ. އަދި ސެމީގެ ދެވަނަ މެޗުގައި ބައްދަލުކުރާނީ ކްރިސްޓަލް ޕެލެސްއާއި، އެސްޓަން ވިލާއެވެ.