އޭޝިއަން ކަޕް ކޮލިފިކޭޝަންގައި މިއަދު ހަވީރު ޔޫރަޕްގެ ތަޖުރިބާހުރި ގިނަ ކުޅުންތެރިންނާއެކު ފިލިޕީންސްއިން ރާއްޖޭގެ މައްޗަށް ކުރިހޯދައިފިއެވެ.

މިއަދު ހަވީރު ފިލިޕީންސްގެ ނިއު ކްލާކް ސްޓޭޑިއަމްގައި ކުޅުނު އެ މެޗު ފިލިޕީންސްއިން ކާމިޔާބުކުރީ 4-1 ގެ ނަތީޖާއަކުންނެވެ. 
އެ މެޗުގައި ފުރަތަމަ ގޯލުޖަހަން ފުރުސަތު ލިބުނީ ރާއްޖެއަށެވެ. ކަައުންޓަ އެޓޭކެއްގައި މެޗުގެ ތިންވަނަ މިނެޓުގައި މުހައްމަދު ނާއިމް ތަނަވަސްކުރި ފުރުސަތަކުން އޭރިއާ ބޭރުން ހަމްޒާ މުހައްމަދު ފޮނުވާލި ހަމަލާ ދިޔައީ ގޯލާ އަމާޒުނުވެއެވެ.

ނަމަވެސް އޭގެ އިރުކޮޅެއްފަހުން، މެޗުގެ ހަވަނަ މިނެޓުގައި ފިލިޕީންސްއިން ވަނީ ގޯލެއްޖަހައި ރާއްޖޭގެ ކުޅުންތެރިން ހާސްކޮށްލައިފައެވެ. ކޯނަރަކުން އެ ގޯލު ޖެހީ ޖެފާސަން ޓަބިނަސްއެވެ.

އެ ގޯލުޖެހިތާ މާ ގިނައިރު ނުވަނީސް ފިލިޕީންސްއިން ވަނީ އިތުރު ގޯލެެއްޖަހައިފައެވެ. ރާއްޖޭގެ މެދުތެރެއިން ހެދި ގޯހެއްގެ ފައިދާ ނަގައިގެން އެ ގޯލު ޖެހީ ބޮޖޯން ކްރިސްޓަންސަންއެވެ.

ނަމަވެސް ދެވަނަ ހާފު ފަށައިގެން ރާއްޖެއިން ވަނީ ކުޅުން ރަނގަޅުކޮށް ގޯލެއްޖަހައިފައެވެ. އެ ގޯލު މެޗުގެ 65 ވަނަ މިނެޓުގައި ކާމިޔާބުކޮށްދިނީ އަލީ ފާސިރުއެވެ.

ނަމަވެސް ފިލިޕީންސް ވަނީ 79 ވަނަ މިނެޓުގައި ގޯލެއްޖަހައި ލީޑު އިތުރަށް ފުޅާކޮށްފައެވެ. ރެންޑީ ޝްނައިޑާ އެ ގޯލު ކާމިޔާބުކުރިއިރު، މެޗުގެ އެންމެ ފަހު މިނެޓުގައި ސަންޑްރޯ ރެޔެސް ވަނީ ހަތަރުވަނަ ގޯލު ކާމިޔާބުކޮށްދީފައެވެ.