ޔޫރަޕް އަދި އެމެރިކާގެ ތަޖުރިބާހުރި ޑިފެންޑަރު ލުއިސް އަލްމެއިޑާ މާޒިޔާއަށް ސޮއިކޮށްފިއެވެ.

މާޒިޔާއިން ބުނީ މިއަހަރުގެ ސީޒަނަށް އަލްމެއިޑާގެ ސޮއި މާޒިޔާއިން ހޯދައިފައިވާކަމަށެވެ.

އަލްމެއިޑާއަކީ ސްޕެއިންގެ ކުލަބުތަކަށް އަދި އެމެރިކާގެ ކުލަބުތަކަކަށް ކުޅެފައިވާ ކުޅުންތެރިއެކެވެ. އެގޮތުން އޭނާ ވަނީ 2022 އިން 2023 ވަނަ އަހަރު ސްޕެއިންގެ ފަސްވަނަ ޑިވިޝަންގެ ކުލަބެއްކަމަށްވާ ޑިޕޯޓިވޯ ލޮސެންޓެންސްއަަށް ކުޅެފައެވެ.

އޭގެ ފަހުން އެމެރިކާއަށް ބަދަލުވެ އޭނާ ވަނީ އެމެރިކާގެ ތިންވަނަ ފަންތީގެ ދެ ކުލަބުކަމަށްވާ އަލްބިއޯން އެސްޑީ އަދި ބޮބްކާސްޓްއަށް ކުޅެފައެވެ.

އެންމެ ފަހުގެ ހަތަރު އަހަރުގެ ލީގު ޗެމްޕިއަންކަން ހޯދި މާޒިޔާއިން ވަނީ މިއަހަރުގެ ލީގަށް ވެސް ކުރިޔާލާ ތައްޔާރުވާން ފަށައިފައެވެ.

އެގޮތުން މިއަހަރުގެ ސީޒަނަށް އެންމެ ފުރަތަމަ ޕްރެކްޓިސް ފެށީވެސް މާޒިޔާއިންނެވެ. އެ ޓީމުން ވަނީ މިއަހަރުގެ ސީޒަނަށް ސްޕެއިނުގެ ތަޖުރިބާކާރު ކޯޗު ލުއިސްމާ ހެނާންޑޭޒް ގެނެސްފައެވެ.

މީގެއިތުރުން ޕޯޗުގަލް ކުލަބުތަކަށް ކުޅެފައިވާ މޮޒަމްބީކުގެ މިޑްފިލްޑަރު ރިކާޑޯ މޮންޑްލޭން ގެ ސޮއި ވެސް މާޒިޔާއިން ވަނީ ހޯދައިފައެވެ. އަދި ޔޫތު ލީގުގައި މޮޅު ކުޅުމެއްދެއްކި މާޒިޔާގެ ޒުވާން ޓީމަށް ކުޅުނު މުހައްމަދު ލާމިހު އިމްތިޔާޒް އާއި ނާޝިއު އަހުމަދު ޝިހާމު ވަނީ ސީނިއާ ޓީމަށް ގެނެސްފައެވެ.