އަންނަ 4 އޭޕްރީލްގައި އޮންނަ ލޯކަލް ކައުންސިލްތަކުގެ އިންތިހާބުގައި އެމްޑީޕީގެ ޓިކެޓްގައި ވާދަކުރާ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީ ފަށައިގެން ކުރިއަށް އެބަދޭ އެވެ. މެންދުރުފަހު 2 އިން މިރޭ 8 ގެ ނިޔަލަށެވެ. 

މި ޕްރައިމަރީގައި ގިނަ ބަޔެއްގެ ނަޒަރު ހުއްޓިފައި އޮންނާނީ މާލޭ މޭޔަރު ޕްރައިމަރީއަށެވެ. 

މި ޕްރައިމަރީގައި ކުރީގެ ރައީސް އިބްރާހީމް މުހައްމަދު ސޯލިހުގެ ތާއީދު އޮތީ މިހާރުގެ މާލެ މޭޔަރު އާދަމް އާޒިމަށެވެ. ކުރީގެ ރައީސް މުހައްމަދު ނަޝީދު ތާއީދުކުރައްވަނީ މެދު ހެންވޭރު ދާއިރާގެ ކުރީގެ މަޖިލިސް މެންބަރު އަލީ އާޒިމް އެވެ. 

މިއީ ނަޝީދު އަނބުރާ އެމްޑީޕީ އެނބުރި ވަޑައިގަތް ފަހުން އެމަނިކުފާނު އާއި ސޯލިހުއާ ދެމެދު ހިނގާ ފުރަތަމަ ކުރިމަތިލުމެވެ. އަދި ސޯލިހުގެ ވެރިކަން ނިމުނު ފަހުން ވެސް ދެ ލީޑަރުންގެ ފުރަތަމަ ކުރިމަތިލުމެވެ.

ސޯލިހުގެ ވެރިކަމުގައި ދެ ރައީސުންގެ ކޮންމެ ކުރިމަތިލުމެއް ކާމިޔާބުކުރެއްވީ ސޯލިހެވެ. 

މާލޭ މޭޔަރު ކަމަށް ވެރިކަންކުރާ ޕީއެންސީން ވާދަކުރައްވަނީ ކުރީގެ ޑިފެންސް މިނިސްޓަރު މޫސާ އަލީ ޖަލީލެވެ. ޕީއެންއެފްގެ ތާއީދާ އެކު ނުކުންނަވަނީ އިސްމާއީލް ޒަރިޔަންދެވެ.