އެއް އަހަރުގެ މެދު ކެނޑުމަކަށްފަހު ބައިބަލާގެ އެންމެ ކާމިޔާބު ޓީމު، ބީޖީ ސްޕޯޓްސް ކުލަބުން އެނބުރި އައިސް މި އަހަރުގެ ފޭވަރިޓުންކަމަށްވާ އޮޑި ސްޕޯޓްސް ކުލަބު ބަލިކޮށްފިއެވެ.

ރޭ ފެށި އީދު ބައިބަލާ ޗެލެންޖުގައި ބީޖީއިން އޮޑީގެ  މައްޗަށް ކުރި ހޯދީ ސީދާ 2 ގޭމުންނެވެ.

ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު އެ މެޗުގެ ފުރަތަމަ ގޭމުގައި އެތެރެއިން ކުޅުނީ ބީޖީ އިންނެވެ. ބޭރުން ވަނީ އޮޑިއެވެ. އެ ގޭމު 5-7 ގެ ނަތީޖާއަކުން ކާމިޔާބުކުރީ ބީޖީއިންނެވެ.

ދެވަނަ ގޭމުގައި ބީޖީއިން ވަނީ ބޭރުން ވަދެ އެތެރޭގައި އޮތް އޮޑީގެ ކުޅުންތެރިންނަށް ނުރައްކާކޮށްފައެވެ. އެ ޓީމުން ވަނީ ބޭރުން އެރައި އޮޑީގެ 17 ކުޅުންތެރިން ނުބައިކޮށްފައެވެ. އެ ގޭމުގައި އޮޑިއަށް ނުބަައިކުރެވުނީ ބީޖީގެ ހަތަރު ކުޅުންތެރިންނެވެ.

އެ މެޗުން މޮޅުވެ ބީޖީ ގަދަ 16 އަށް ދަތުރުކުރިއިރު، އޮޑި ވަނީ މުބާރާތުން ކަޓައިފައެއެވެ.

އީދު ބައިބަލާ ޗެލެންޖަކީ ކޮންމެ އަހަރެއްގެ ވެސް ފިތުރު އީދާ ދިމާކޮށް ބައިބަލާ އެސޯސިއޭޝަނުން އިންތިޒާމުކޮށްގެން ބާއްވާ މުބާރާތެކެވެ.