އެންމެން އަޒުމްކަނޑައަޅަންވީ ގައުމާ އެއްކޮޅަށް ސިކުނޑި ބޭނުންކުރަން ރައީސް ޑރ. މުހައްމަދު މުއިއްޒު ގޮވާލައްވައިފި އެވެ. 

މިއަދު ފާހަގަކުރަމުންދާ ނަސްރުގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ނަސްރުގެ ދުވަހު ކޮންމެ ދިވެއްސެއްގެ ޒިންމާއަކަށްވާންވީ ގައުމުގެ މިނިވަންކަމާއި ސިޔާދަތާއި އިސްތިގުލާލު ހިމާޔަތްކުރުން ކަމަށެވެ. އަދި އަންނަ ޖީލަށް އެކަން ފޯރުކޮށްދިނުން ކަމަށެވެ. 

ރައީސް ވިދާޅުވީ ކޮންމެ މީހަކަށް ތަމްރީނު ދީގެން ހަތިޔާރެއް ނުދެވޭނެ ކަމަށާއި ނަމަވެސް ކޮންމެ މީހެއްގެ އަތުގައި ވެސް ބާރުގަދަ ހަތިޔާރެއް އެބައޮތް ކަމަށެވެ. އެ މަނިކުފާނު ވިދާޅުވީ އެއީ އެ މީހަކަށް ދެއްވައިފައިވާ ސިކުނޑި ކަމަށެވެ. 

''އެމީހެއްގެ މީހެއްގެ ވިސްނުން ގައުމާ އެއްކޮޅަށް ގައުމާ ބޭނުންކުރަން އަޒުމް ކަނޑައަޅައި އެގޮތުގައި ރެއާއި ދުވަލު އެ މީހާގެ ވިސްނުމާއި އެ މީހާގެ ހިތުގެ އަޑިން ގައުމުދެެކެ ލޯބިވާ ގައުމާ އެއްކޮޅަން ކަންކަން ކުރަންވީ'' އެހެން ވިސްނުން ބަހައްޓާނަމަ ގައުމާ މެދު ކަންބޮޑުވާން ނުޖެހޭނެ ކަމަށް އެމަނިކުފާނު ވިދާޅުވި އެވެ.

އެއަށް ފަހު އެމަނިކުފާނު ވިދާޅުވީ ގައުމެއް ގައުމަކަށްވަނީ އެ ގައުމެއްގެ ރައްޔިތުންގެ ވިސްނުމުގެ މައްޗަށް ކަމަށެވެ.އަދި ރައްޔިތުން ވިސްނުން ގައުމާ އެއްކޮޅަށް ނޯންނަނަމަ، ގައުމަށް ގެންނަ ތަރައްގީއަކީ ވެސް ބޭނުމެއް ނެތް އެއްޗެއް ކަމަށްވެސް ރައީސް ވިދާޅުވި އެވެ.