''އެމަޖެންސީގައި އޮތް އެމްބިއުލާންސަކަށް ޖާގަ ދިނުންވެސް މީ މިހާރު ނެތްކަމެއް'' ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) 'އެކްސް' ގައި ކުރި ވީޑިއޯއެއް ހިއްސާކޮށް ވިދާޅުވީ މިހެނެވެ. ކުޑޫ އެހެން ވިދާޅުވި ސަބަބު އެ ވީޑިއޯ އިން ވަރަށް ސާފެވެ. 

ވީޑިއޯއިން ފެންނަނީ އެމްބިއުލާންސެއް ބޮޑުތަކުރުފާނު މަގުގައި ހުންނަ ބޭންކް އޮފް މޯލްޑިވްސްއާ ޖެހިގެން އޮންނަ ގޯޅިން ނިކުންނަން މަސައްކަތްކުރާތަނެވެ. އެމްބިއުލާންސް 'ރިވާސް' ކުރަން މަސައްކަތްކުރެ އެވެ. އެކަމަކު ފަހަތުން އެއްވެސް މީހަކު އެމްބިއުލާންސްއަށް ނިކުންނަން ޖާގަ ނުދެ އެވެ. ދުއްވާ މީހުން އެމްބިއުލާންސް ފަހަތުން ހުއްޓުމެއް ނެތި ދުއްވަނީ އެވެ. 

އެމްބިއުލާންސް އެގޮތަށް އިރުކޮޅެއް ވަންދެން ގޯޅިން ބޮޑުތަކުރާފަނު މަގަށް ނުނިކުމެ އޮތެވެ. އެމްބިއުލާންސަށް ބޮޑު މަގަށް ނިކުންނަން ޖަގާ ލިބުނީ ޓްރެފިކް ޕޮލިހެއް އެތަނަށް ގޮސް ދުއްވަމުން ދިޔަ މީހުން ހުއްޓުވުމުންނެވެ. 

ކުޑޫ ހިއްސާކުރި ވީޑިއޯ އަށް ވަނީ ގިނަ ބައެއްގެ ސަމާލުކަން ވަނީ ލިބިފަ އެވެ. ''ހަތް ފެނުގައި ކެއްކިޔަސް އިސްލާހު ނުވާ ހިސާބުގައި އަހަރުމެން ދިވެހިން މި ތިބީ" އެ ޕޯސްޓަށް ކޮމެންޓުކުރި މީހަކު ބުންޏެވެ. 

އެ ޕޯސްޓަށް ކޮމެންޓުކުރި އިތުރު މީހަކު ބުނީ އެ ވީޑިއޯ އިން ހާމަވަނީ ދިވެހިންގެ ނާތަހުޒީބުކަން ކަމަށެވެ. މިއިން ހާމަވި އަނެއް ކަމަކީ ދިވެހިން އެއްވެސް ވަރަކަށް ޓްރެފިކުގެ ޑިސްޕްލިން އެއް ނެތް ކަމެވެ.