އީދު ހަވީރު މިއަދާއި މާދަމާވެސް ކުރިއަށްދާނެކަމަށް މޯލްޑިވްސް ނޭޝަނަލް ޑިފެންސް ފޯސްއިން ބުނެފިއެވެ. 

ފިތުރު އީދު ދުވަހާ ގުޅިގެން އެމްއެންޑީއެފްއިން އިއްޔެ ކުރިއަށް ގެންދިޔަ ހަރަކާތްތައް މިއަދާއި މާދަމާވެސް ހަވީރު 4:00 އިން 6:00 އަށް ޖުމްހޫރީ މައިދާނުގައި ކުރިއަށްދާނެކަމަށް އެމްއެންޑީއެފުން ބުނެފައިވެއެވެ. 

އިއްޔެ ފިތުރު އީދު ދުވަހުގެ އުފަލުގައި މާލެއާއި ރާއްޖޭގެ އެކި ރަށްރަށުގައިވަނީ އެކި ހަރަކާތްތައް ކުރިއަށް ގެންގޮސްފައެވެ. ފިތުރު އީދު ދުވަހުގެ މުނާސަބަތުގައި ރާއްޖެ ދިއްލާލުމުގެ މަޝްރޫއުގެ ތެރެއިން ރާއްޖޭގެ 65 ރަށަކާއި މާލެ އާއި ހުޅުމާލެވެސް ދިއްލާލާފައިވެއެވެ. 

މީގެ އިތުރުން ފިތުރު އީދުގެ އުފަލުގައި އިއްޔެ ހަވީރު މާލޭގައި ކުޑަކުދިންގެ ހަވީރެއް ބާއްވާފައިވެއެވެ. އަދި ރޭ ހުޅުމާލޭގައި ޑްރޯން ޝޯއަކާއި އެކު ހަވާ އެރުވުންވެސް ކުރިއަށް ގެންދިޔައެވެ. 

ރޭ މާލޭގައި ވަނީ އިހުގެ ކުޅިވަރުތައް ދައްކާލާފައެވެ. ސަރުކާރާއި ސަރުކާރު ހިއްސާވާ ކުންފުނިތަކުން ގުޅިގެން ފިތުރު އީދު ދުވަހު ކުރިއަށް ގެންގޮސްފައިވާ ހަރަކާތްތައް ވަރަށް ކުލަގަދަކޮށް ކުރިއަށްދިޔައެވެ.