އެޗްޑީސީގެ ލިއުންތަކެއް ނައްތާލި ކަމަށް ތުހުމަތުކުރާ މައްސަލާގައި އެ ކުންފުނީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދަށް ދައުވާނުކުރަން ޕްރޮސެކިއުޓާ ޖެނެރަލް (ޕީޖީ) އޮފީހުން ނިންމައިފި އެވެ. 

ފަޒުލް އެ މަގާމުން ވަކިވަނީ، ބިންވެރިޔާ' ސްކީމުން ގޯތި ލިބޭ މީހުންގެ ލިސްޓުގައި ނަން ނުހިމެނޭ، ފަޒުލްގެ ބޭބެ އަދި އޭރު އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދަށް ގޯއްޗެއް ދޫކުރިކަން ފެންމަތިވުމާއެކު އެވެ. 

މި މައްސަލާގައި ފަޒުލާއި އެޗްޑީސީގެ އައިޓީ ހެޑް އަބްދުﷲ ޝުހޫދުގެ މައްޗަށް ކުންފުނީގެ ސާވާގައި ހުރި ލިއުންތައް ރިކަވާ ވެސް ނުކުރެވޭ ގޮތަށް ޑިލީޓްކުރި ކަމަށް ތުހުމަތުކޮށްފައިވެ އެވެ. 

ނަމަވެސް އެ ކަމަށް ބާރު ދޭނޭ އެއްވެސް ހެކި ގަރީނާއެއް ފެނިފައިނުވާ ކަމަށް ޕީޖީ އޮފީހުން މިއަދު ބުންޏެވެ. އަދި އެޗްޑީސީން ވެސް ބެލުމަށް ފަހު އެ ކުންފުނީގެ ސާވާއިން އެއްވެސް ލިއުމެއް ނުގެއްލޭކަން އަންގާފައިވާ ކަމަށެވެ. 

އެހެންވެ ދައުވާ ނުކުރާ ގޮތަށް އަދި މައްސަލަ އިތުރަށް ކުރިއަށް ނުގެންދާ ގޮތަށް ޑިކްލައިން ކުރުމަށް ޕީޖީ އޮފީހުން ނިންމި އެވެ.