ލޯކަލް ކައުންސިލްތަކުގެ އިންތިހާބުގައި އަމިއްލަ ގޮތުން ވާދަކުރާ ފަރާތްތަކުގެ ތާއީދު ފޯމު ހަމައެކަނި އީފާސް މެދުވެރިކޮށް ފުރަން ޝަރުތުކޮށްފައިވާތީ ހުށަހެޅި މައްސަލަ ހައި ކޯޓުން ބަލައިނުގަންނަން ނިންމައިފި އެވެ. 

މި މައްސަލަ ހައި ކޯޓަށް ހުށަހެޅުއްވީ ކުރީގެ ރައީސް އަބްދުﷲ ޔާމީންގެ ޕީއެންއެފް އިންނެވެ. ޕީއެންއެފްގެ ފަރާތުން މައްސަލަ ހުށަހެޅުއްވީ އެ ޕާޓީގެ ސެނެޓް މެންބަރު އަދި ގާނޫނީ ވަކީލު އާދަމް އާސިފެވެ. 

އާދަމް އާސިފަށް ހައި ކޯޓުގެ ރަޖިސްޓްރާ ފޮނުވި ލިއުމުގައި ވަނީ މައްސަލަ ބަލައިނުގަތުމަށް ނިންމީ އިލެކްޝަންސް ކޮމިޝަން (އީސީ) އިން އެ ގޮތަށް ޝަރުތުކުރުން އެއީ ގާނޫނާ ޚިލާފުވާ ގޮތެއް ބަޔާންކޮށްފައި ނެތުމުންނެވެ. 

މިދިޔަ ހަފުތާ މި މައްސަލަ ހައި ކޯޓަށް ހުށަހެޅިއިރު، އަދި އިއްޔެ ކުރިމަތިލުމުގެ ވަގުތު ހަމަވެގެން ދިޔަ އިރު ވެސް ކޯޓުން މައްސަލަ ބަލައިގަތުމާ މެދު ވަކި ގޮތެއް ނުނިންމަ އެވެ. ކޯޓުން ގޮތެއް ނިންމީ މިއަދު އެވެ.