ރާއްޖޭގައި ދުންފަތުގެ އިސްތިއުމާލު ކުރުން މަނާކުރާނެ އުމުރެއް ކަނޑައެޅުމަށް ރައީސް މުހައްމަދު މުއިއްޒު އާންމުންގެ ހިޔާލު ހޯއްދަވަން މިއަދު ފައްޓަވައިފި އެވެ.

ރައީސްގެ އެކްސް އެކައުންޓުގައި މިއަދު ހުޅުވި ޕޯލްގައި ވަނީ، ތިން ގޮތަކަށް "ޖެނެރޭޝަން ބޭން" ކަނޑައަޅަން ހުޅުވާލައްވައިފައެވެ. އެއީ 2000 ވަނަ އަހަރުގެ ފަހުން ވިހެއި އެންމެންނަށް، ނޫނީ 2004 ވަނަ އަހަރުގެ ފަހުން ވިހެއި އެންމެނަށް ނޫނީ 2007 ވަނަ އަހަރުން ފެށިގެން ވިހެއި އެންމެނަށް ދުންފަތުގެ ހުރިހާ އުފެއްދުމެއް މަނާކުރާށުމެވެ.

 'ރައްޔިތުންނާ އެކު' ޕޮޑްކާސްޓުގެ ނަމުގައި ރައީސް މުއިއްޒު މިފަހުން ގެނެސްދެއްވަން ފެއްޓެވި ޕޮޑްކާސްޓުގެ ދެވަނަ އެޕިސޯޓުގައި ރައީސް މުއިއްޒު ވަނީ 18-25 އަހަރުގެ މީހުންނަށް ދުންފަތުގެ އިސްތިއުމާލުކުރުން މަނާކުރުމުގެ ވިސްނުމެއް ގެންގުޅުއްވާކަން ހާމަކުރައްވައިފަ އެވެ. 

ރައީސް ވަނީ، ދުންފަތުގެ ބާވަތްތައް ރާއްޖެއަށް އެތެރެކޮށް އޭގެ ވިޔަފާރިކުރާ ފަރާތްތަކުންވެސް އެ ވިޔަފާރިން ދުރުވެ އެހެން ކަމަނާ އުޅުއްވުމަށް ގޮވާލައްވައިފައެވެ.

ދުންފަތުގެ އިސްތިއުމާލުކުރުމާ ދެކޮޅަށް މި ފަހުން ސަރުކާރުން ވަނީ ގިނަ ފިޔަވަޅުތަކެއް އަޅައިފަ އެވެ. އެގޮތުން ރާއްޖޭގައި ވޭޕް މަނާކުރުމާއި ދުންފަތުގެ ބާވަތްތަކުން ނަގާ ޑިއުޓީ ސަރުކާރުން ވަނީ ބޮޑުކޮށްފަ އެވެ.