މަސްތުވާތަކެތީގެ ވިޔަފާރިއާ ދެކޮޅަށް ފުލުހުން ފެށި "އަލިމަގު" އޮޕަރޭޝަނުގައި މާލެއާއި ގއ. އަތޮޅުން މިދިޔަ އާދިއްތަ ދުވަހު ހައްޔަރުކުރި ހަތަރު މީހުންގެ ބޭންކު އެކައުންޓުތަކުގައި މިދިޔަ ފަސް އަހަރުތެރޭ 300 މިލިއަން ރުފިޔާއާއި ހަތަރު ލައްކަ ޑޮލަރު ދައުރުކުރި ކަމަށް ފުލުހުން ބުނެފި އެވެ.

ފުލުހުންގެ އޮޕަރޭޝަންގައި ހައްޔަރުކޮށްފައިވާ ހަތަރު މީހުންނަކީ، ޝެވޯނާ / ގއ. ވިލިނގިލި، ޝައްފާޙް ލަޠީފް (28އ) މިޔުޒިކީއާގެ / ގއ. ވިލިނގިލި، އަހުމަދު މަދީހު (33އ)، އައިޒަން / ގއ. ވިލިނގިލި، އަޙްމަދު އަނާމް އިބްރާހީމް (30އ)ގެ އިތުރުން  އަރާއިރުގެ / ގއ. ވިލިނގިލި، ނޫރުއްނިޒާމް (35އ) އެވެ. 

ފުލުހުން ބުނީ ގޮތުން ފާއިތުވި 5 އަހަރު ތެރޭގައި މި ނެޓްވޯކްގެ މެންބަރުންގެ ބޭންކު އެކައުންޓުތަކުގައި 300 މިލިއަނަށް ވުރެ ގިނަ ދިވެހި ރުފިޔާއާއި ހަތަރު ލައްކައަށް ވުރެ ގިނަ އެމެރިކާ ޑޮލަރު ދައުރުކޮށްފައިވާ ކަމަށާއި އެމީހުންގެ އެކައުންޓުތަކުގައި ދައުރުވި ފައިސާގެ ތެރެއިން، މަދީޙުގެ ބޭންކު އެކައުންޓުތަކުގައި 17,174,461.12ރ  ދައުރު ކޮށްފައިވާ ކަމަށެވެ.

އަދި އަނާމްގެ ބޭންކް އެކައުންޓުތަކުގައި 38،812،690.60ރ ދައުރު ކޮށްފައިވާ ކަމަށް ފުލުހުން ބުންޏެވެ. ފުލުހުން ބުނީ ޝައްފާހްގެ ބޭންކް އެކައުންޓުތަކުގައި 6،916،752.83ރ ދައުރު ކޮށްފައިވާ ކަމަށެވެ. 

އެ މައްސަލާގައި ކޯޓު އަމުރެއްގެ ދަށުން މިހާތަނަށް 13 ފަރާތެއްގެ 53 ބޭންކު އެކައުންޓު ފްރީޒް ކުރެވިފައިވާ ކަމަށް ފުލުހުން ބުންޏެވެ.