މަސްތުވާތަކެއްޗާ ދެކޮޅަށް ފުލުހުން މިއަދު 'އޮޕަރޭޝަން އަލިމަގު'' ގެ ނަމުގައި ބޮޑު އޮޕަރޭޝަނެއް ފަށައި މިހާތަަނަށް 97 މީހަކު ހައްޔަރުކޮށްފި އެވެ.

މިިއަދު ހެނދުނު 05:30 ގައި ފެށި އެ އޮޕަރޭޝަނަކީ އިންޓެލިޖެންސް މައުލޫމާތަށް ބިނާކޮށް މުޅި ރާއްޖެ ހިމެނޭގޮތަށް ފަށާފައިވާ އޮޕަރޭޝަނެކެވެ. އެގޮތުން މި އޮޕަރޭޝަނުގައި 500 އަށްވުރެ ގިނަ ފުލުހުން ބައިވެރިވެ، ސްޕެޝަލައިޒްޑް ޑިޕާޓްމަންޓްތަކާއި ރީޖަންތަކުން ވިލަރެސްކުރެވިގެން އެކުލަވާލެވިފައިވާ ޓީމުތަކުން މުޅި ރާއްޖޭގެ 100 އަށްވުރެ ގިނަ ތަންތަނުގައި އެއްވަގުތެއްގައި ތަންތަން ބަލައި ފާސްކުރުމާއި ގާނޫނު ތަންފީޒުކުރުމުގެ އަމަލީ މަސައްކަތްތައް ކުރިއަށް ގެންދާނެ ކަމަށް ފުލުހުން މައުލޫމާތުދެ އެވެ. 

އެ އޮޕަރޭޝަނުގެ ފަހުގެ މައުލޫމާތު ހިއްސާކުރަމުން ފުލުހުން ބުނީ، މިހާތަނަށް 97 މީހަކު ހައްޔަރުކުރުމުގެ އިތުރަށް 86 ތަނެއް ބަލައި ފާސްކޮށްފައިވާ ކަމަށެވެ. ފުލުހުން ބަލައި ފާސްކުރި ތަންތަނުން ގިނަ އަދަދެއްގެ ފައިސާގެ އިތުރުން މަސްތުވާތަކެތި ހޯދާފައިވެ އެވެ. 

"އޮޕަރޭޝަން އަލިމަގު" އަކީ ފަހުގެ އަހަރުތަކުގައި އެންމެ ފުޅާ ދާއިރާއެއްގައި ހިންގޭ މަސްތުވާތަކެއްޗާ ދެކޮޅު ހަރަކާތެވެ. މިއީ ރާއްޖޭގައި ހަރަކާތްތެރިވާ މަސްތުވާތަކެތީގެ ވިޔަފާރިކޮށް ޓްރެފިކްކުރާ ވިއުގަތައް ހުއްޓުވައި، މުޅިން ނައްތާލުމަށާއި، މުޖުތަމައުގައި މަސްތުވާތަކެތި ފެތުރުމުގައި ޒިންމާވާ ފަރާތްތައް ގާނޫނުގެ ކުރިމައްޗަށް ގެނައުމަށް ކުރެވޭ ދެމެހެއްޓެނިވި މަސައްކަތްތަކުގެ ތެރެއިން ހިންގޭ އޮޕަރޭޝަނެކެވެ.