ފިތުރު އީދުގެ މުނާސަބަތާއި ގުޅުވައި މިރޭ ހުޅުމާލެ ސެންޓްރަލް ޕާކުގައި ޑްރޯން ޝޯ އަކާއެކީ ހަވާ އެރުވުމަށް ނިންމައިފިއެވެ.

އެޗްޑީސީން ބުނެފައިވަނީ މިފަދަ ހަރަކާތެއް ބޭއްވުމަށް ހަމަޖެއްސީ ފިތުރު އީދުގެ އުފާ ކުލަގަދަކޮސް ފާހަގަކުރުމަށް ކަމަށެވެ. މިރޭ 8:30 ގައި ތިރީސް މިނިޓަށް ޑްރޯން ޝޯ ކުރިއަށްދާނެކަމަށާއި 9:00 ގައި ހަވާ އަރުވާނެކަމަށް އެޗްޑީސީން ބުނެފައިވެއެވެ. 

މި ފިތުރު އީދުގެ މުނާސަބަތާއި ގުޅުވައި މިއަދު 4:00 އިން 6:00 އަށް ކުދަކުދިންގެ ހަވީރެއް ބޭއްވުމަށް ހަމަޖެހިފައިވާއިރު، އީދު ހަދިޔާ ދިނުމާއި މުނިފޫހިފިލުވުމުގެ ހަރަކާތްތަކެއްވެސް އެވަގުތު އެތާނގައި ކުރިއަށްދާނެކަމަށްވެސް އެޗްޑީސީން ބުނެފައިވެއެވެ. 

ހުޅުމާލޭގައި އީދު ހަރަކާތްތައް ކުލަގަދަކޮށް ބޭއްވުމަށް ހަމަޖެހިފައިވާއިރު މާލޭގައިވެސް މިއަދު ހަރަކާތްތަކެއް ބޭއްވުމަށް ހަމަޖެހިފައިވެއެވެ. އެގޮތުން ސަރުކާރު ހިއްސާވާ ބައެއް ކުންފުނިތައް ގުޅިގެން "އީދު ހަވީރު"ގެ ނަމުގައި ހަރަކާތްތަކެއް ބޭއްވުމަށް ހަމަޖެހިފައިވެއެވެ. މި ހަރަކާތް ކުރިއަށްދާނީ ސަލްޓަންޕާކާއި، ޖުމްހޫރީ މައިދާނުގެ ސަރަހައްދުގައެވެ. 

މި ފިތުރު އީދު ފާހަގަ ކުރުމުގެ ގޮތުން ރާއްޖޭގެ ހުރިހާރަށެއް ދިއްލުމުގެ މަސައްކަތުގެ ތެރެއިން 65 ރަށެއް ވަނީ ދިއްލާފައިވެއެވެ. އަދި މާލެއާއި ހުޅުމާލެވެސް ވަނީ ދިއްލާފައެވެ.