ރާއްޖެއިން ފްރާންސަށް ކަނޑައަޅުއްވައިފައިވާ "ނޮން ރެސިޑެންޓް" ސަފީރު ޑރ.އިރުތިޝާމް އާދަމް، އެ ކަމަނާގެ ސަފީރުކަމުގެ ފަތްކޮޅު ފްރާންސްގެ ރައީސް އެމެނުއެލް މެކްރޯނަށް އަރުވައިފިއެވެ. 

ހާރިޖީ ވުޒާރާއިން ބުނި ގޮތުގައި ޑރ.އިރުތިޝާމް އާދަމްގެ ސަފީރުކަމުގެ ފަތްކޮޅު އެރުވުމުގެ ރަސްމިއްޔާތު ބާއްވާފައިވަނީ ފްރާންސްގެ ވެރިރަށް ޕެރިހުގައި ހުންނަ އެ ގައުމުގެ ރިޔާސީ ގަނޑުވަރުގައި ކަމަށެވެ. 

އެ ރަސްމިއްޔާތުގައި ޑރ.އިރުތިޝާމް އާދަމް ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ދިވެހި ސަރުކާރުގެ އިތުރުން ދިވެހި ރައްޔިތުންގެ ފަރާތުން ފްރާންސްގެ ރައީސްއަށާއި އެ ގައުމުގެ ރައްޔިތުންނަށް ހެޔޮ އެދުންތައް އަރިސްކުރައްވާފައެވެ.

މީގެ އިތުރުން އެ ރަސްމިއްޔާތުގައި ވިޔަފާރިއާއި އިގްތިސޯދީ ދާއިރާއިން ދެ ގައުމުގެ ދޭތެރޭ ގުޅުން ބަދަހިކުރުމުގެ މަޝްވަރާތައް ކުރައްވާފައިވާކަމަށްވެސް ހާރިޖީ ވުޒާރާއިން ބުނެފައިވެއެވެ. 

ޑރ. އިރުތިޝާމަކީ ރާއްޖެއިން އިނގިރޭސިވިލާތަށް ކަނޑައަޅުއްވައިފައި ހުންނަވާ ސަފީރުވެސްމެއެވެ.