ކާމިޔާބު ފިލްމު ޑައިރެކްޓަރު އަބްދުލްފައްތާހު މިރޭ ނިޔާވެއްޖެ އެވެ. 

އެނގިފައިވާ ގޮތުން ފައްތާހު ނިޔާވީ ސްޓްރޯކެއް ޖެހިގެންނެވެ. އޭނާ ނިޔާވީ ހއ. އަތޮޅު ހޮސްޕިޓަލުގައި ފަރުވާދެމުން ދަނިކޮށެވެ. 

މިމަހު  21 ވަނަ ދުވަހު ފައްތާހު ވަނީ ކެލާ ކައުންސިލުގެ ރައީސް ކަމަށް ކުރިމަތިލާން ނިންމައިފި ކަމަށް ފޭސްބުކް ޕޯސްޓެއްގައި ވިދާޅުވެފައެވެ. ފައްތާހުގެ ފޭސްބުކް އެ ޕޯސްޓެއްގައި ވިދާޅުވި ގޮތުގައި އޭނާ ވާދަކުރެއްވުމަށް ނިންމަވާފައިވަނީ ވެރިކަންކުރާ ޕީއެންސީގެ ޓިކެޓުގައެވެ.

ކެލާއަކީ އޭނާގެ އުފަން ރަށެވެ.

މިދިޔަ ހޮނިހިރު ދުވަހު އޮތް ޕީއެންސީގެ ޕަރައިމަރީގައި އޭނާ ވަނީ ވާދަކޮށްފައެވެ. ނަަމަވެސް ބައެއް ދާއިރާަތަކުގެ ނަތީޖާ ޕިއެންސީއިން އަދި އިއުލާންކޮށްފައި ނުވާއިރު އޭގެތެރޭގައި ކެލާ ވެސް ހިމެނެއެވެ. 

ފައްތާހަކީ މީގެ ކުރިން ކާމިޔާބު އެތައް ފިލްމެއް ޑައިރެކްޓު ކުރައްވާފައިވާ ކުޅަދާނަ ޑައިރެކްޓަރެކެވެ. އޭނާ ރިޓަޔާ ކުރެއްވުމުގެ ކުރިން ޑައިރެކްޓު ކުރައްވާފައިވާ އެންމެ ފަހު ފިލްމަކީ "ހައްދު" އެވެ.