ޑިޖިޓަލް ކުރަނީ ވޯޓުލުން ފިޔަވައި ހުރިހާ ހިދުމަތެއް ކަމަށް ދާޚިލީ ވަޒީރު އަލީ އިހުސާން މިއަދު ވިދާޅުވެއްޖެއެވެ.

ވަޒީރު މިހެން ވިދާޅުވީ, ސަރުކާރުން އީވޯޓިން ތައާރަފުކޮށް ވޯޓު އޮޅުވާލަން މަސައްކަތްކުރާ ކަމަށް އިދިކޮޅު އެމްޑީޕީއަށް ނިސްބަތްވާ ކުރީގެ ޔޫތު މިނިސްޓަރު އަހުމަދު މަހުލޫފު ކުރެއްވި ތުހުމަތަކަށް ރައްދު ދެއްވަމުންނެވެ.

އިދިކޮޅު އެމްޑީޕީގެ އެހެން ބައެއް އެކްޓިވިސްޓުން ވެސް އަންނަނީ މިފަދައިން ވާހަކަ ފަތުރަމުންނެވެ.

އަދި މިއީ ކުރިން ވެސް ރައީސް ތަކުރާރުކޮށް ދެއްކެވި ވާހަކަފުޅެއް ކަން ވަޒީރު ފާހަގަ ކުރެއްވިއެވެ.

"އެސްޓޯނިއާގަވެސް އަދި ރޭގަވެސް ރައީސް ތަކުރާރުކުރެއްވި އެއް ވާހަކަފުޅަކީ އީ ވޯޓިންގ ފިޔަވައި އަޅުގަނޑުމެން އެސްޓޯނިއާގައި ޑިޖިޓަލްކޮށް ދެމުންދާ ހުރިހާ ޚިދުމަތެއް ދޭންވާނެކަމަށް" ވަޒީރު އިހުސާން ވިދާޅުވިއެވެ.

މިކަމުގެ ފަހަތުގައި ކޮރަޕްޝަން ނައްތާލައި ހަރަދު ކުޑަކުރުން ކަމަށް ވެސް ވަޒީރު ވިދާޅުވިއެވެ. އަދި ހިދުމަތްތައް އަވަސްކޮށް ރައްޔިތުންނަށް ލުއިފަސޭހަ ކޮށްދިނުން ވެސް މިކަމުގެ ފަހަތުގައި ހިމެނޭ ކަމަށް ވަޒީރު ވިދާޅުވިއެވެ.

"ބައެއް ކަންކަމަކީ ގައުމަށްޓަކައި ސިޔާސީ ދެބަސްވުން އެއްކިބާ ކުރަންޖެހޭ ކަންކަން. މިއީ އެފަދަ ކަމެއް." މިނިސްޓަރު އިހުސާން ވިދާޅުވިއެވެ.

ދައުލަތުގެ ހުރިހާ ހިދުމަތެއް ޑިޖިޓަލައިޒް ކުރުމަށް ރާއްޖެ 2.0 ގެ ނަމުގައި ވަނީ މަޝްރޫއުއެއް ފަށާފަ އެވެ. އަދި ރޭގައި އެކަމާ ގުޅޭ ސަމިޓެއް ވެސް ފެށި އެވެ.