މޮވަނު ޝަފީގު ޑައިރެކްޓްކުރި ފުރަތަމަ ފީޗާ ފިލްމު އަދި އިއްޔެ ސިނަމާއަށް ނެރުނު 'ދޯދި' ފިލްމަށް ކުރީގެ ރައީސް މުހައްމަދު ނަޝީދު ވަރަށް ބޮޑަށް ތައުރީފް ކުރައްވައިފި އެވެ.

ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ އެ ފިލްމު ބަލަން އެމަނިކުފާނު ވަޑައިގެންނެވި ކަމަށާއި ލީޑު ރޯލުން ފެނުނު ލީނާ އާއި އެހެން ރޯލްތައް ކުޅުނު އިންނަ އާއި ޝަހުދީންގެ އެކްޓިން ވަރަށް ކަމުދިޔަ ކަމަށެވެ. 

"ކޮންމެ ގޮތަކުން ބެލިއަސް މޮޅު ފިލްމެއް. މި ފިލްމު ބަލައިލަން ދާން އެންމެނަށް ވެސް ރެކޮމެންޑްކުރަން," ނަޝީދު ވިދާޅުވި އެވެ. 

"ފިލްމުގެ މުޅި ކްރޫއަށް މަރުހަބާ," 

މިއީ ވެރިރަށް މާލޭގެ ދިރިއުޅުމާއި ދިވެހި ޒުވާނަކު ފުރާވަރަށް އަރައިގެން އަންނަ އިރު ދިމާވާ ކަންކަމުގެ މައްޗަށް ދައްކުވައިދޭ 'ދިވެހިވަންތަ' ވާހަކައެއް ހިމެނޭ ފިލްމެކެވެ.

އެއް ގަޑިއިރާއި 42 މިނެޓުގެ އެ ފިލްމުގެ ލީޑު ތަރިންނަކީ ލާނާ ޖަލީލް، އާމިރާ އިސްމާއީލް، އާމިނަތު އިންނާ، އަދި ޝަހުދާން ޝަރީފް އެވެ. މާލޭގައި ދިރިއުޅޭ ޒުވާން ޅެންވެރިއެއް ކަމަށްވާ މަލްގެ ރޯލު ކުޅޭނީ ލާނާ އެވެ. ސްކޫލް ތިއޭޓާގެ ތަޖުރިބާ ހުރި ނަމަވެސް ލާނާއަށް ވެސް މިއީ އޭނާގެ ފުރަތަމަ ފީޗާ ފިލްމެވެ.

މައިގަނޑު ވާހަކަ އަކީ އޭނާ ބޭރަށް ކިޔަވަން ދާން ދެކޭ ހުވަފެނުގެ ވާހަކަ އެވެ.