ދިވެހި ޕްރިމިއާ ލީގު އޮގަސްޓު މަހަށް ފަސްކޮށް އަންނަ މަހު ވާދަވެރި އެހެން މުބާރާތެއް ބާއްވަން މަސައްކަތްކުރާކަމަށް އެފްއޭއެމްއިން ބުނެފިއެވެ.

އެފްއޭއެމްއިން ކުލަބުތަކަށް ފޮނުވި ސިޓީއެއްގައި ބުނީ ކުލަބުތަކުން އެދުނު ގޮތަށް އަންނަ މަހު ލީގު ފަށަން. އެފްއޭއެމްއިން ވަރަށް ބޮޑަށް ތައްޔާރުވިކަމަށެވެ.

އެހެންނަމަވެސް ފުޓުބޯޅައިގެ މައި އިދާރާ ފީފާއިން ވަނީ ރާއްޖޭގެ ލީގު އޮގަސްޓުމަހަށް ފަސްކުރަން އަންގައިފައެވެ.

އެހެންކަމުން ކުލަބުތަކާއި ކުޅުންތެރިންނަށް ދިމާވާނެ އުނދަގޫތައް ކުޑަކުރުމަށް އަންނަ މަހު ވާދެވެރި އެހެން މުބާރާތެއް ބާއްވަން މަސައްކަތްކުރާކަމަށް ވެސް އެފްއޭއެމްއިން ވަނީ ބުނެފައެވެ.

ފީފާއިން ރާއްޖޭގެ ލީގު ފަސްކުރަން އެންގިއިރު، ފީފާއިން ރާއްޖެ ސަރަހައްދަށް ކަނޑައަޅާފައި ހުންނަ ބިދޭސީ އޮފިޝަލް، ހައްރާޒު ރާއްޖޭގެ ފުޓުބޯޅައަށް ނުފޫޒު ފޯރުވަން މަސައްކަތް ކުރާކަމަށް ބައެއް ކުލަބުތަކުންނާއި ބައެއް ކޯޗުން މީގެ ކުރިން ވެސް ވަނީ ބުނެފައެވެ.

އެގޮތުން މިމަހުގެ 16 ވަނަ ދުވަހު ބޭއްވި އަސާސީ ގަވާއިދު އިސްލާހު ކުރުމަށްޓަކައި، ބޭއްވި ބައްދަލުވުމުގައި ވެސް ހައްރާޒު ވަނީ ލީގު ފަސްކުރަން ބާރުއަޅައިފައެވެ.

މީގެ އިތުރުން، މިމަހުގެ 17 ވަނަ ދުވަހު ބޭއްވި ވޯކްޝޮޕްގައި އޭނާ ވަނީ އަންނަމަހު ލީގު ފަށާނަމަ ދެ މަސް ދުވަހުގެ ތެރޭގައި ލީގު ނިންމަން ވެސް މަޝްވަރާކޮށްފައެވެ. އޭނާ ލީގު ކުރުކުރަން ބޭނުންވަނީ. 2025/2026 ވަނަ އަހަރުގެ ލީގު އޮގަސްޓު މަހުގައި ފަށަންށެވެ.

2023 ވަނަ އަހަރުގެ ލީގު އެ އަހަރުގެ ޑިސެންބަރު މަހުގެ ތެރޭގައި ނިމުނު ގޮތަށް އަދި ވަނީ ފެށޭގޮތް ނުވެފައެވެ.

އެކަމުގެ ސަބަބުން ރާއްޖޭގެ ގައުމީ ޓީމަށާއި ލީގުގެ ކުލަބުތަކަށާއި، ކުޅުންތެރިންނަށް ވަނީ ގިނަ ގެއްލުންތަކެއްވެފައެވެ.

އެފްއޭއެމްއިން މިއަހަރުގެ ލީގު ފަށަން ތިން ފަހަރެއްގެ މަތިން ވަނީ މަސައްކަތްކޮށްފައެވެ. އެންމެ ފަހުން އެފްއޭއެމްއިން ލީގު ފަށަން ޝެޑިއުލްކުރީ އަންނަ މަހުގެ 8 ވަނަ ދުވަހަށެވެ.

އަންނަ މަހުގެ 8 ވަނަ ދުވަހު ލީގު ފަށަން ލީގުގައި ކުޅޭ 10 ކުލަބުގެ ތެރެއިން 9 ކުލަބުން ވަނީ ފަރިތަކުރުންތައް ފަށައިފައެވެ. އަދި އެންމެ ފަހުގެ މާޒިޔާ އަދި އަލަށް ޕްރޮމޯޓުވި އޮޑި ސްޕޯޓްސް ކުލަބުން ވަނީ ބިދޭސީ ކުޅުންތެރިންނާއި ކޯޗުން ވެސް ގެނެސްފައެވެ.

ލީގަށް ފަރިތަކުރުންތައް ނުފަށައި އޮތީ ޔުނައިޓެޑް ވިކްޓްރީއިންނެވެ. އެ ކުލަބުން ފަރިތަކުރުންތައް ނުފަށައިވަނީ އެ ކްލަބުން ފުރިހަމަ ކުރަން ޖެހޭ ބައެއް ލިޔެކިޔުންތައް ފުރިހަމަ ނުވުމުގެ ސަބަބުން ލީގުގެ ކޮންމެ ކުލަބަކަށް ސަރުކާރުން ދޭ އެއް މިލިއަން ރުފިޔާ ނުލިބޭތީއެވެ. ނަމަވެސް ޔޫވީ އިން އަންނަނީ އެ ލިޔެކިޔުންތައް ފުރިހަމަކުރުމަށް މަސައްކަތް ކުރަމުންނެވެ. ޔޫވީ ނޫން ހުރިހާ ކުލަބަކަށް ވަނީ ފައިސާ ދޫކޮށްފައެވެ.