އއ. ރަސްދޫގައި ރޭ ހިނގި އަލިފާނުގެ ހާދިސާއެއްގައި ފިހުނީ ދެމަފިރިން ކަމަށާއި އެ މީހުންނަށް މިހާރު ފަރުވާދެމުން އަންނަނީ އައިޖީއެމްއެޗުގެ އިމަޖެންސީގައި ކަން އެނގިއްޖެއެވެ.

އެ ދެމަފިރިން ފިހުނީ، އެ މީހުން ނިދާފައި ތިއްބައި ކޮޓަރީގައި ރޯވެގެންނެވެ. 

އައިޖީއެމްއެޗުގެ މީޑިއާ އޮފިޝަލް "ކުރިއަށް މީޑިއާ" އަށް މިއަދު ވިދާޅުވީ، ފިހިގެން ރޭގެ ވަގުތެއްގައި 31 އަަހަރުގެ އަންހެނަކާއި ފިރިހެނަކު އެ ހޮސްޕިޓަލަށް ގެނެސްފައިވާ ކަމަށެވެ. އެ މީހުންނަށް ފަރުވާދެމުން އަންނަނީ އެމަޖެންސީގައި ކަމަށް އޭނާ ވިދާޅުވިއެވެ. ނަމަވެސް އެ މީހުންނަށް ލިބިފައިވާ އަނިޔާގެ ތަފްސީލެއް އޭނާ ކިޔައެއް ނުދިނެވެ. 

އެނގިފައިވާ ގޮތުގައި އެ ހާދިސާގައި އަންހެން މީހާގެ ހަށިގަނޑުގެ ވަރަށް ބޮޑު ބައެއް ވަނީ ފިހިފައެވެ. އަދި ފިރިހެން މީހާގެ ހަށިގަނޑުވެސް ބައެއް ސަރަހައްދުތައް ފިހިފައިވާކަން އެނގިފައިވެއެވެ. 

އެނގިފައިވާ ގޮތުގައި، އެ ދެމަފިރިންނަށް އިތުރު ފަރުވާ ދިނުމަށް ރާއްޖޭން ބޭރަށް ގެންދިއުމުގެ މަސައްކަތް އަންނަނީ ކުރަމުންނެވެ.