ދ. އަތޮޅުގެ ރައްޔިތުން ދަތުރުގޮސް އުޅެލުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަނޑައަޅުއްވައިދެއްވާފައިވާ  އެއަތޮޅު އުއްދޫގައި ވަރަށް އަވަހަށް އިންތިޒާމްތައް ހަމަޖައްސައިދެއްވާނެކަމުގައި މިނިސްޓަރ އޮފް ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް އާދަމް ޝަރީފް އުމަރު ވިދާޅުވެއްޖެ އެވެ. 

އެކްސްގައި ޕޯސްޓުކުރައްވަމުން މިނިސްޓަރު ވިދާޅުވީ، އުއްދޫއަކީ ޕިކްނިކް ދާ ރަކަށް ހެދުމަށްޓަކައި އެރަށް ތަރައްގީކުރާނެ ގޮތުގެ ޕްލޭނެއް އެކުލަވާލުމުގެ މަސައްކަތް ކުރުމަށް، މިނިސްޓްރީގެ ޓީމެއް މިއަދު އެރަށަށް ގޮސްފައިވާ ކަމަށެވެ. 

އަދި ވަރަށް އަވަހަށް އުއްދޫއަކީ ދަތުރުދާ ރަށެއްގެ ގޮތުގައި ތަރައްގީކޮށް ނިންމާނެ ކަމަށް މިނިސްޓަރު ވިދާޅުވި އެވެ. 

އުއްދޫ އަކީ ދަތުރުދިއުމަށް ހާއްސަ ރަށެއްގެ ގޮތުގާ ކަނޑައަޅާފައި ވަނީ ފެބްރުއަރީ މަހުގެ ފަހުކޮޅު ރައީސް ދ. އަތޮޅަށް ކުރެއްވި ދަތުރުފުޅުގެ ތެރެއިން އެއަތޮޅު މީދޫ ރައްޔިތުންނާ ބައްދަލުކުރައްވަ އެވެ. 

އުއްދޫއަކީ މީގެ ކުރިން ރިސޯޓެއް ތަރައްގީ ކުރުމަށް ވިޔަފާރިވެރިއަކަށް ދީފައިވާ ރަށެކެވެ. ރިސޯޓު ތަރައްގީކުރުމަށް ދީފައިވާ މުއްދަތު ހަމަވެފައިވާތީ އަލުން އެރަށް ވަނީ ސަރުކާރުގެ ބެލެހެއްޓުމުގެ ދަށަށް ނަގާފަ އެވެ. 

އުއްދޫ އަކީ ގާތްގަނޑަކަށް 10 ހެކްޓަރު ބޮޑުމިން ހުރި ރަށެކެވެ. އެރަށް އޮންނަނީ އެއަތޮޅު މީދޫއާ ދާދި ކައިރީގަ އެވެ.