ޑިވެލޮޕްމަންޓް ބޭންކް އޮފް މޯލްޑިވްސް (ޑީބީއެމް)ގެ މެނޭޖިން ޑިރެކްޓާ އަދި ސީއީއޯގެ މަގާމުގައި ހުންނެވި މރ. ނޮއެލް ގްރެގަރ ޕެޓަރސަން-ޖޯންސް އިސްތިއުފާ ދެއްވައިފި އެވެ. 

އޭނާ މަގާމުން އިސްތިއުފާ ދެއްވިކަން އިއުލާންކޮށްފައި ވަނީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އެކްސްގައި ކުރި ޕޯސްޓެއްގަ އެވެ. މި ޕޯސްޓުގައި ބުނީ ޑީބީއެމްގެ ސީއީއޯ އިސްތިއުފާ ދެއްވުމަށް ހުށަހަޅުއްވާފައި ވާތީ، އިސްތިއުފާ ގަބޫލުކޮށް މަގާމުން ވަކިކޮށްފައިވާކަމަށެވެ. 

މި ސަރުކާރުން ރާއްޖޭގެ އިގްތިސާދީ ހާލަތު ހަރުދަނާކުރުމަށްޓަކާ ގާއިމްކުރި ޑީބީއެމްގެ ސީއީއޯ އަދި މެނޭޖިން ޑިރެކްޓަރުކަމުގައި ހުންނެވި ނޮއޮލް ދެކުނު އެފްރިކާގެ ކޭޕް ޓައުން ޔުނިވާސިޓީން ޑިގްރީ ފުރިހަމަ ކުރުމަށް ފަހު މާސްޓާސް ހެދީ އޮކްސްފޯޑް ޔުނިވާސިޓީންނެވެ.

އޭނާއަކީ ބޭންކިން ދާއިރާގައި 28 އަހަރު ހޭދަކޮށްފައިވާ ތަޖުރިބާކާރު ބޭންކަރެކެވެ.

ނޮވެމްބަރު މަހު ރަސްމީކޮށް ހުޅުވި ޑީބީއެމްގެ މަސައްކަތްތަކެއް އަދިވެސް ނުފަށަ އެވެ. ޑީބީއެމް މަސައްކަތްތަކާ ގުޅޭ ގޮތުން އެންމެ ފަހުން އިކޮނޮމިކް މިނިސްޓަރު މުހައްމަދު ސައީދު ވިދާޅުވެފައި ވަނީ، އެ ބޭންކުގެ ހިދުމަތްތައް ފެށުމަށްޓަކާ ކުރަން ޖެހޭ އިދާރީ މަސައްކަތްތައް ކުރިއަށް ދާކަމަށެވެ. 

ބޭންކް ގާއިމްކޮށްފައިވަނީ، ޗާންދަނީ މަގުގައި ހުންނަ ބީސީސީ އޮފީސް އިމާރާތުގަ އެވެ