ކްރިމިނަލް ކޯޓާއި ޑްރަގު ކޯޓުގެ ޖާގައިގެ ދަތިކަން ހައްލުކުރުމަށް އިމާރާތްކުރަމުން އަންނަ ކޯޓު އިމާރާތުގެ މަސައްކަތްތައް ކުރިއަށްދާ ގޮތް ރައީސް ޑރ. މުހައްމަދު މުއިއްޒު ބައްލަވާލައްވައިފި އެވެ. 

ރައީސް މިއަދު ކޯޓު އިމާރާތުގެ ޕްލޭންތައް ބައްލަވާލެއްވުމަށް ކުރެއްވި ޒިޔާރަތުގައި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ބައެއް އިސް ބޭފުޅުންނާއި ގެދޮރުވެރިކަމާއި ބެހޭ ވަޒީރުގެ އަރިހުން އެ މަސައްކަތުގައި މިހާތަނަށް ލިބިފައިވާ ކުރިއެރުންތައް އޮޅުންފިލުއްވާފައިވެއެވެ.

މި ޒިޔާރަތުގައި ކެބިނެޓުގެ ވަޒީރުންނާއި ޝަރުއީ ދާއިރާގެ އިސް ބޭފުޅުންނާއި ސަރުކާރުގެ އިސްވެރިން ބައިވެރިވެވަޑައިގެންނެވިއެވެ.

ރާއްޖޭގެ ޖިނާއީ އަދުލުގެ ނިޒާމަށް މިއަދު ކުރިމަތިވެފައިވާ އެންމެ ބޮޑު އެއް ގޮންޖެހުމަކީ، މައްސަލަތަކުގެ އަޑުއެހުންތައް ލަސްވެ، ޙުކުމަކާ ހަމައަށް ވާސިލުނުވެ ދިގުލައިގެން ދިއުން ކަމުގައި، މި އަހަރުގެ ރިޔާސީ ބަޔާނުގައި، ރައީސް ވަނީ ފާހަގަކުރައްވާފައެވެ.

މިއާއެކު ކޯޓުތަކަށް ދިމާވެފައި އޮތް ޖާގައިގެ ދަތިކަމަށް ހައްލު ހޯއްދަވައިދެއްވުމުގެ ގޮތުން، ހުޅުމާލޭގައި ސުޕީރިއާ ކޯޓު ކޮމްޕްލެކްސް އެޅުމުގެ މަސައްކަތް، މިއަހަރު ފައްޓަވާނެ ކަމުގައި އެމަނިކުފާނު ވިދާޅުވި އެވެ. އޭގެ ކުރިއަށް ވެސް ކްރިމިނަލް ކޯޓާއި ޑްރަގް ކޯޓު ހިންގަން ހުޅުމާލޭގައި ހަދާ އިމާރާތުގެ މަސައްކަތް ނިންމޭނެ ކަމަށް ރައީސް ވިދާޅުވެފައިވެ އެވެ.

ދަޢުލަތުގެ ތިން ބާރުގެ ތެރެއިން އެއް ބާރު ކަމުގައިވާ ޝަރުޢީ ދާއިރާއަކީ، ރައްޔިތުން އިތުބާރުކުރާ ދާއިރާއަކަށް ހެދުމަށްޓަކައި ގާނޫނުތަކަށް ގެންނަން ޖެހޭ ބަދަލުތައް ގެނައުމުގެ މަސައްކަތް ވެސް ސަރުކާރުން ގެންދަނީ ކުރަމުންނެވެ.