ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބާއްވަން ރައްޔިތުންގެ ފެންނަ ނުފެންނަ ވޯޓު އަންނަ 4 އޭޕްރީލްގައި ނެގުމަށް ރައީސް ޑރ. މުހައްމަދު މުއިއްޒު ނިންމަވައި އެ ކަމުގެ ގަރާރު ނެރުއްވައިފި އެވެ. 

އަންނަ 4 އޭޕްރީލަކީ ލޯކަލް ކައުންސިލްތަކުގެ އިންތިހާބު ވެސް އޮންނަ ދުވަހެވެ. އެ ދުވަހު ފެންނަ ނުފެންނަ ވޯޓު ނެގުމަށް މީގެ ކުރިން ވެސް ސަރުކާރުން ދިޔައީ މަސައްކަތް ކުރަމުންނެވެ. 

މަޖިލީހުގެ މެޖޯރިޓީ ލީޑަރު އިބްރާހިމް ފަލާހް ގާނޫނުއަސާސީއަށް އިސްލާހު ގެންނަންް ހުށަހެޅުއްވި ބިލު މަޖިލީހުން ވަނީ ފާސްކޮށްފަ އެވެ. ނަމަވެސް މިހާރު ހިނގާ މަޖިލީހުގެ ދައުރު ކުރަން އޭގައި ހިމެނޭތީ ބިލު ތަސްދީގު ކުރެވޭނީ ރައްޔިތުންގެ އަގުލަބިއްޔަތު އެ ކަމަށް ލިބޭނަމަ އެވެ. 

އެ ބިލުގައިވަނީ ހިނގަމުންދާ މަޖިލީހުގެ ދައުރު 1 ޑިސެމްބަރު 2028އަށް ކުރުކުރުމަށެވެ. 

ހިނގަމުންދާ 20ވަނަ މަޖިލީހުގެ ދައުރު ހަމަވަނީ މެއި 2029ގަ އެވެ. ދައުރު ކުރުކުރަނީ ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބޭއްވުމަށެވެ. 

މަޖިލީހުގެ ދައުރު ކުރުކުރާތީ މި ކަމުގައި ރައްޔިތުންގެ ފެންނަ ގޮތް ބަލަން ވޯޓެއް ނަގަން ޖެހެ އެވެ. އެ ކަން ތަންފީޒުވާނީ ރައްޔިތުންގެ އަގުލަބިއްޔަތު ލިބިގެނެވެ.

ސަރުކާރުން ނިންމާފައިވަނީ އަންނަ ލޯކަލް ކައުންސިލްތަކުގެ އިންތިހާބާއެކު މި ކަމުގެ ފެންނަ ނުފެންނަ ވޯޓެއް ނެގުމަށެވެ