ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިހާބަށް ކުރިމަތިލުމަށް ފޯމު ހުށަހެޅުމުގެ ވަގުތު އިލެކްޝަންސް ކޮމިޝަން (އީސީ )އިން އިތުރުކޮށްފި އެވެ.

އީސީން މިއަދު ބުނީ އިންތިހާބުގައި ވާދަކުރުމަށް އޮންލައިންކޮށް ފޯމު ހުށަހެޅުމަށް ކޮންމެ ދުވަހަކު ވެސް އިތުރު ދެ ގަޑިއިރު ލިބޭނެ ކަމަށެވެ.

އީސީގެ އެ ނިންމުމާއެކު މިއަދުން ފެށިގެން އަންނަ މަހުގެ 1 ވަނަ ދުވަހުގެ ނިޔަލަށް ފޯމު ހުށަހެޅުމަށް އިތުުރު ވަގުތު ކޮންމެ ދުވަހަކު ވެސް ލިބޭނެ އެވެ. ފޯމު ހުށަހެޅޭނީ، ހުކުރު ދުވަސް ފިޔަވާ ކޮންމެ ދުވަހެއްގެ ހެނދުނު 8:30 އިން ހަވީރު 5:30 އަށެވެ. އަދި ހުކުރު ދުވަހުގެ މެންދުރު ފަހު 3:30 އިން ރޭގަނޑު 8 އަށެވެ. 

އިންތިހާބަށް ކުރިމަތިލުމަށް ފޯމު ހުށަހެޅުމުގެ ވަގުތު އިތުރުކޮށްފައިވާއިރު، ފޯމު ހުށަހެޅުމަށް އިތުރު 10 ދުވަސް ދިނުމަށް އިދިކޮޅު އެމްޑީޕީން މިއަދު ވަނީ ގޮވާލާފަ އެވެ.